Suspek sa tulis abswelto
Naabsuwelto sa kasong pagpanulis ug paglapas sa Comelec Gun Ban ang usa ka suspetsadong tulisan nga ilang nadakpan sa N. Bacalso street ning siyudad sa Sugbu niadtong Mayo 9, 2007.
Si Judge Estela Alma Sinco sa branch 12 sa Regional Trial Court (RTC) 7 miabsuwelto kang Winster Gemita sa kasong robbery ug kalapasan sa Comelec Gun Ban tungod kay walay search warrant ang polis nga misikop kaniya.
Nasayran nga si Gemita naglakaw sa N. Bacalso kauban ang iyang higalang konduktor sa PUJ nga si Rico Nabua dihang nasigpatan kini sa mga polis nga miresponde niadtong tungora sa usa ka alarma sa tulis sulod sa PUJ sa maong lugar.
Sila si PO3 Ramon Bolongaita ug PO2 Celso Sarong nga maoy nagsakay sa Mobile Patrol car nakasigpat sa suspetsado busa diha diha gihunongan kini ug girikisa ug nakuhaan og 38 kalibre nga home made pistol nga may upat ka buhing bala.
Apan gipanghimakak kini ni Gemita kinsa mitumbok nga walay nakuhang armas ang mga polis kaniya.
Si Judge Sinco wala mohatag og gibug-aton sa pamahayag nila ni Bolongaita ug Sarong tungod sa kapakyas niini sa paghingalan sa giingong gitulis sa suspetsado.
- Latest
- Trending
