Pagpiyansa sa shabu queen gitutokan

CEBU - Gipasalig sa Regional State Prosecutors Office nga ilang tutokan ang kaso ni Shabu Queen Chuebe Lim human kini makapiyansa og P160 mil.

Kini human siya hidakpi uban sa 100 gramos nga shabu dihang gironda sa kapolisan ang iyang balay sa Guadalupe niadtong niaging semana.

Si Dangerous Drugs Board Undersecretary Atty. Clarence Paul Oaminal, maoy misusi bahin sa kantidad sa gipiyansa ni Lim nga minus ra ug wala mahitukma sa gimandar sa balaod.

Si Usec. Oaminal nakighinabi kang Regional State Prosecutor Fernando Gubalane ug gituki ang bahin sa pagpiyansa ni Lim.

Matud pa ni Usec. Oaminal nga si Gubalane mipasabot nga adunay discretion ang mga piskal sa pagpa-kunhod sa kantidad sa piyansa sa usa ka akusado.

Matud pa ni Usec. Oaminal nga ang P160 mil nga gipapiyansa sa korte kang Lim minus kaayo, kay base sa balaod P200 mil pesos man ang piyansa niadtong naghupot og ginadiling drugas nga dili molapas sa 5 ka gramos.

Matud pa ni Usec. Oaminal nga iya nang gipahibalo niini si Superintendent Ritchie Posadas sa Criminal Investigation and Detection Group (CIDG)7nga andam moabag ang City Prosecutors Office batok sa kaso ni Lim ug pinaagi sa pagpataban sa konbiksyon sa akusado sa motion to increase bail bond mamahimo nang P500 mil ang piyansa niini.

Nasayran nga si Grace Alejandrino kinsa nadakpan usab kauban ni Lim walay piyansang gipangayo ang korte tungod sa paghupot niini og 100 gramos nga gituohang shabu. – BANAT NEWS