CEBU - Gisugyot ni kanhi Mayor Thadeo Z. Ouano ang pagtuon alang sa pagbahin ngadto sa tulo ka distrito sa dakbayan sa Mandaue, Lapulapu ug duha ka mga lungsod sa Consolacion ug Cordova.
Nunot sa maong sugyot mao usab ang maghatag og kahigayonan sa paghimong lungsod sa isla sa Olango nga maoy ilakip sa Cordova ug Consolacion isip usa ka distrito.
Matud pa ni Ouano nga ang mao niyang sugyot mahimong makab-ot kun ang mga personalidad nga adunay katakus sa pagkumbinsir sa katawhan ug mga dagko sa kagamhanan magkahiusa alang sa paghatag og katumanan.
Naglakip kanila sila si Provincial Board Member Victor Maambong, kanhi Senador Sonny Osmeña, kanhi Provincial Board Member Gabriel Luis Quisumbing ug Lapulapu City Councilor Jonard “Ahong” Chan nga maghiusa alang sa pagpatuman sa maong plano.
Gipasabot ni Ouano nga ang maong lakang mahimong madali sa paghatag og katumanan kun ang oposisyon ug administrasyon magkahiusa sa pagsuporta sa pagbahin sa ikaunom nga distrito ngadto sa tulo ka distrito. – BANAT NEWS