City Hall mibayad na'g guarantee fee

CEBU - Mibayad na niadtong miaging adlaw ang kagamhanan sa dakbayan sa Sugbu ngadto sa nasudnong kagamhanan alang sa guarantee fee niining tuiga.

Kini subay usab sa utang sa City government ngadto sa nasud sa Japan pag-ugmad sa kontrobersyal nga South Road Properties (SRP).

Ang 2% nga guarantee fee gipangayo sa national government gikan sa siyudad sa Sugbu tungod kay ang nasudnong kagamhanan maoy migarantiya sa pagpangutang niini.

Matud sa Assistant City Treasurer for Administration nga si Emma Villarete, ang siyudad mibayad karong tuiga ug P38.1 milyones.

Sumala ni Villarete nga sukad sa pagsugod og bayad sa dakbayan sa utang niini niadtong 1996, mokapin na usab sa P396 milyones ang ilang nabayran nga guarantee fee.

Kini nagpasabot nga mikita na og minilyon ka pesos ang nasudnong kagamhanan sukad niadtong 1996 bisan kung wala pa mahalin ang SRP.

Ang guarantee fee giingong matag tuig nga bayran sa dakbayan hangtud maimpas ang utang sa siyudad sa SRP unya sa tuig 2025.

Miingon hinuon si Villarete nga magkagamay usab ang guarantee fee nga bayran kung hapit na maimpas ang dakong utang sa dakbayan.

Nasayran nga ang siyudad mibayad usab og P40 milyones nga guarantee fee sa miaging tuig ngadto sa nasudnong kagamhanan pinaagi sa Land Bank of the Philippines.

Ang dakbayan adunay utang nga 10.193 billion yen sa Japan Bank of International Cooperation (JBIC) nga maoy gigasto pag-ugmad sa SRP.

Gipaabot hinuon nga makapundo na ang City government alang sa pagbayad sa utang sa SRP kung mabaligya na ang portion niini.

Ang Filinvest Land Incorporated maoy unang miduso og proposal pagpalit og luna sa SRP gawas sa pagpakig-joint venture niini sa City government. – BANAT NEWS