Georgia O. sa 2010 dakong pasiatab

CEBU - Gihulagway sa pipila ka kaalyado ni Mayor Tomas Osmeña nga usa lang ka intriga ang gikatahong posibilidad nga magpapili ang igsuon sa mayor sa umaabot nga eleksyon.

Ang igsoon ni Osmeña nga gipalutaw nga magpapili sa 2010 elections mao si Georgia Osmeña nga giingong niparehistro na niadtong miaging Huwebes.

Apan karon pa lang gisalikway nang daan ni Konsehal Sylvan Jakosalem ang maong posibilidad ug gihulagway nga kini usa lang ka intriga.

Gipasabot sa konsehal nga ang pagparehistro usa ka katungod apan kini wala magpasabot nga magpapili na sa eleksyon.

Pabiling nagtoo si Jakosalem sa gipahibawo ni mayor-on-leave Tomas Osmeña nga si acting mayor Michael Rama maoy suportahan niini sa 2010 elections.

“Gipahibawo na man ni Tommy nga si Mike maoy official candidate pagkamayor sa BOPK, mitoo mi niya,” sumala sa konsehal.

Ang pamahayag ni Jakosalem gidasunan usab ni Konsehal Raul Alcoseba nga kusganong nagtoo nga seryuso si Osmeña sa gipahibawo niini.

Alang sa konsehal nga dili sayon ang pagpapili og posisyon sa kagamhanan kung walay igong makinarya nga mopaluyo sa kandidato.

“Wala gyud nay basihanan ilang giingon, intriga lang gyud na aron mabuak among grupo sa BOPK,” nagkanayon si Alcoseba.

Una nang gipadayag ni Georgia atol sa pagpakighinabi niini sa mga tigbalita nga siya nagpabiling bukas sa posibilidad nga mosulod sa politika.

Kini ilabi na nga napanglantawan sa mga political observer sa Sugbu nga wala nay materyal ang mga Osmeña alang sa 2010 elections.

Nasayran nga si Capitol consultant Rory Jon Sepulveda maoy nipahibawo nga nagparehistro na si Georgia sa Comelec sa siyudad.

Gani niingon si Sepulveda nga siya andam mobutar niini kung magpapili ang iyang kanhi kliyente sa pagkamayor sa dakbayan.

Wala hinoon matino kung ang Capitol consultant narehistro o nagparehistro na ba usab sa Comelec sa siyudad. – BANAT NEWS