Ouano vs. Quisumbing sa 2010?

Nagkadako ang kahigayonan sa panagsakbang ni kanhi Provincial Board Member Gabriel Luis Quisumbing ug kanhi Mayor Thadeo Ouano alang sa pagka-kongresista sa ikaunom nga distrito sa lalawigan sa Sugbo.

Nunot usab kini sa gipadayag ni Lapulapu City Councilor Jonard “Ahong” Chan nga sila si Ouano ug Quisumbing mao lamang ang mitumaw nga mga pangalan nga adunay igong katakus sa pagrepresentar sa ikaunom nga distrito.

Matud pa ni Chan nga si Ouano isip kanhi mayor sa Mandauedako kaayo'g nahimo alang sa pagpalambo sa maong dakbayan sa natad sa patigayon ug pagmugna og mga proyekto nga napahimuslan karon sa mga Mandauehanon.

Gitataw niya nga labing maayo nga mapakaylap ni Ouano ang katakus sa iyang panerbisyo publiko sa tibuok distrito sanglit malakip na man unya niini ang dakbayan sa Lapulapu.

Si Antero “Jun” Caña, tigpamaba niOuano nga nahinabi sa Banat News ang naniguro alang sa pag-apil ni Ouano sa politika sa 2010 eleksiyon.

Ang dili lang niya masiguro niining panahona kun magpapili ba kini alang sa pagka kongresista sanglit gipaabot pa man ang pulso sa pamilya nga Ouano ug mga lider niini. Matud pa ni Caña nga sa ilang grupo ni Ouano maoy suportahan sa pagka mayor sa dakbayan sa Mandaue si 6th District Representative Nerissa Soon-Ruiz kinsa anaa na karon sa iyang katapusang termino.

Kini maoy mosakbang kang Mayor Jonas Cortes kinsa magpasubli sa iyang ikaduhang termino sa 2010 eleksiyon nga kaalyado usab ni kanhi Provincial Board Member Quisumbing.