Kaso vs lider sa kulto gibasura

Gibasura sa Lapulapu city prosecutor ang lima ka kaso batok sa lider ug miyembro sa kulto didto sa isla sa Olango nga misulay og patay pinaagi sa pagdagmal sa pamilya nga giakusang “international nga ungo” ug mikaon og 500 mil ka mga tawo.

 Si Lapulapu city assistant city prosecutor Jesus Rodrigo Tagaan ug City Prosecutor Evangeline Gacale mitumbok sa ilang pito ka pahina nga joint resolution niadtong Nobiyembre 17,2008 nga walay "criminal intent" ang tulo ka kasong frustrated murder ug duha ka kasong physical injury nga gipasaka sa pamilya ni Erlinda Traya batok sa lider sa kulto nga si Ayessa Juezan, SK Chairman sa usa sa barangay sa Olango island, ug mga kaubanan sa kulto.

 Sa nasayran nga si Traya, nga taga Datag, Maribago, Lapulapu city nagpatambal sa nagmasakiton niyang anak nga si Stephanie ngadto sa kulto sa Olango island. Sa dihang gihiling na ni Juezan si Stephanie giingnan si Traya nga may espiritu nga nakagusto sa iyang anak ug gikinahanglan nga isulod sa ilang kapilya.

 Apan kalit lamang migawas ug miakusar siJuezan ni Traya nga “ungo siya” ug nakakaon og 40 ka mga tawo samtang ang iyang anak nga si Stephanie usa ka “internationl nga ungo” nga nagsuroysuroy sa tibuok kalibutan kay nakakaon og 500 mil ka mga tawo.

 Sigon ni Traya nga si Juezan mimando sa iyang mga sakop nga pugson siya ug si Stephanie sa pagpa-inom og tubig ug bino, pahigdaon ug kuptan ang liog samtang ang uban mohapak sa ilang dughan ug ubang bahin sa lawas aron masuka ang gikaon niining lawas sa tawo. Gipasulod usab ang ubang miyembro sa pamilyang Traya nga sila si Kenneth, Roland ug Karen May aron usab dagmalan kay miyembro sa pamilyang ungo. Nimando usab ang lider sa kulto nga patyon sila ug ihagbong sa atabay.

 Apan bisan pa man niini, ang piskalya miingon nga ang mga akusado walay motibo sa pagpasakit ug walay intensiyon sa pagpatay ngadto sa pamilyang Juezan kay mipaubos kini sa “faith healing session”.

 Hinuon, si Atty. Mark Elton Garrote ang abogado sa pamilyang Traya nakaduso na og motion for reconsideration diin iyang gitumbok nga may “bias” ang desisyon sa piskalya sa maong kaso.

 Sa iyang bahin, si Crusade Against Violence national vice president Thelma Chiong nakurat sa pagbasura sa Lapulapu city prosecutor office sa lima ka kaso batok sa lider sa kulto sa isla sa Olango.

 Si Chiong nagkanayon nga angayan pa gani kini pasakaan og laing kaso tungod sa ilegal nga pagdetener sa mga biktima.