Tulisan natusak sa bala sa polis

Natusak sa bala ang buko-buko sa usa ka tulisan human kini mapusili sa usa ka polis atol sa gipahigayon nga checkpoint sa may MJ Cuenco Avenue, barangay Tejero ning dakbayan niadtong Huwebes sa gabii.

Ang napulisan giila sa kapolisan nga si Rolando Duazo, naila sa alias “Palong,” 23, taga Sitio Palama barangay San Roque kinsa nagpabilin sa Cebu City Medical Center (CCMC) samtang nadakpan usab ang kauban niining si Aljie Cancio nagpuyo sa Villagonzallo II barangay Tejero, lumad nga taga Hapitan, Barili.

Si Sr. Inspector David Señor nga nahinabi sa mga tigbalita nagkanayon nga mipahigayon sila og checkpoint diha sa MJ Cuenco, Tejero mga alas 10 uban sa mga barangay tanod sa nahisgutang dapit.

Apan sa dihangilang gipahunong ang PUJ nga gikan sa Colon nga padulong sa dakbayan sa Mandaue kalit lang midagan ang duha sa tulo ka mga suspetsado nga sila si Duazo, Cancio ug laing wala mailhing kauban niini. Hinuon si Cancio nakuptan kini ug nakuhaan sa “batangas knife”.

Matud pa ni Señor nga si PO1 Jose Randel Buscato kinsa diha sa duol sa dihang nangambak ang mga tulisan nga maoy migukod niini ug mimando sa pagpahunong apan sa kalit lang miatubang ang mga suspetsado dayon pusil ngadto sa nahisgutang polis.

Hinuon si PO1 Buscato daling nakahapa ug nakapabuto sa iyang armas ug naigo sa buko-buko si Duazo. Pipila ka minutos nadakpan kini sa mga barangay tanod didto sa interior nga bahin sa nahisgutang barangay.

Ang hepe sa kapolisan sa dakbayan sa Sugbu, Sr. Supt. Patrocinio Comendador mikonpirmar nga si Duazo aduna kini warrant of arrest nga giisyu ni Judge Buenaventura Saniel sa Regional Trial Court (RTC-20) sa kasong robbery.

Matud pa ni Comendador nga magsilbing warning sa mga tulisan ang pagkasikop sa duha nga gihulagway nga ubay-ubay na ang giigonga mga pasahero diha sa nahisgutang lugar.

Si Duazo nakuhaan sa iyang possession sa usa ka orihinal nga .32 pistol uban sa usa ka magazine nga wala nay bala samtang nakuha sa posesyon ni Cancio ang usa ka Batangas knife.

Si Cancio nga nahinabi sa mga tigbalita miangkon kini nga sila mga tulisan ug mopadulong na unta silang mamauli niadtong higayona gumikan kay mingaw ug wala pa silay natulis apan gidemalas gumikan kay naaktuhan sa checkpoint.

Si Cancio bag-ohay lang nakagawas sa Cebu City Jail niadtong bulan sa Septembre ning tuiga human usab kini madakpi sa dihang nanulis niadtong tuig 2006.

Samtang sa pikas nga bahin nalandig sa CCMC ang usa sakop sa Alpha Kappa Rho (AKHRO) human usab kini pusila sa iyang ka-brod mga alas 9:30 sa gabii niadtong Huwebes diha sa may B. Aranas Ext. barangay Duljo-Fatima.

Duha ka samad pinusilan sa iyang buko-buko ang naangkon ni Giovanni Canillo, 26, sa dihang kalit lang gipauwanan og mga bala sa suspetsado nga ginganlan og “Bobby Boro” ug kauban niining ginganlan lang og “Jojo” lomulupyo sa maong dapit.

Base  sa report sa Homicide Section gikataho nga ang biktima nag-estoryahanay kini gawas sa panimalay sa iyang agawon sa dihang kalit mibutho ang mga suspetsado sa way daghang estorya mipusil makadaghang higayon.