Basurero nakakaplag $60 mil mitahan

Mipatim-aw na ang batan-ong basurero nga gikatahong maoy nakakita sa $60 mil nga gilabay sa dumpsite sa Inayawan nga gipanag-iya sa usa ka moneychanger.

Si Napoleon Alburo, 20, nga taga barangay Inayawan miasoy nga siya misibat uban sa iyang live-in partner human mapagya ang pagkakaplag sa mga dolyares.

Kini tungod usab sa ilang kahadlok dihang nasayod nga sila gipangita na sa mga ahente sa National Bureau of Investigation (NBI-7).

Matud ni Alburo nga didto sila modangop sa igsoon sa iyang kapuyo sa lungsod sa Argao human mahalin ang ilang binuhi nga baboy.

Apan tungod kay giingong nahurot na ang halin sa baboy, ang magtiayon nakahukom nga mobalik na lang sa barangay Inayawan.

Gipadayag sa batan-on nga wala silay nadala sa iyang nakit-ang mga dolyares tungod kay ang iyang nakuha gitugyan usab ngadto sa iyang igsoon nga si Julie Compuesto.

Samtang si Compuesto mao nay mitugyan sa maong kuwarta nga balig $17 mil ngadto sa NBI.

Lakip sa gikatahong miuli sa nakuha usab niining $3 mil ngadto sa NBI-7 mao ang iyaan ni Alburo nga si Victoria Candido.

Giasoy ni Alburo nga dihang nasayran sa iyang mga kaubang basurero nga siya nakakita og mga dolyares, siya gitapuk-an niini ug nag-iyahay sila og sikop sa maong mga salapi ug ang iyang nahipos mao kadtong gihurot usab niyag hatag sa iyang igsoon nga si Julie.

Naglisod hinoon si Alburo pagtudlo sa iyang mga kauban nga nakakuha og bahin sa mga dolyares tungod kay kini giingong nagtaptap sa ilang mga nawong.

Apan iyang gipanghimakak nga dunay kalambigitan ang ilang barangay kapitan sa Inayawan nga si Rustom Ignacio sa nakit-ang mga dolyares.

Una nang gikataho nga gitugyan ni Alburo ang mga dolyares ngadto sa kapitan apan kusganon niining gipanghimakak ang maong report. Sa pagsuwat ning balita, nagpabilin pa si Alburo sa DYHP-RMN Cebu nga maoy gidangpan sa magtiayon sa ilang pagbalik sa siyudad sa Sugbu kagahapong adlawa.

Ang station manager sa DYHP nga si Attorney Ruphil Bañoc mitataw nga mahimong maimbistigar si Alburo sa mga otoridad nga nangita kaniya.

Apan iyang gitataw nga dili niya tugutang madala si Alburo sa ahensya nga mopahigayon ug imbistigasyon.