Vendor natusak sa bala patay

Patay ang usa ka manindahay og tempura human kini matusak- tusak sa bala dihang gipusil sa duha ka tawo nga nagmotorsiklo didto sa barangay Matab-ang siyudad sa Toledo kagahapon sa alas 12:30 sa kaadlawon.

Ang biktima nga tempura vendor mao si Eduardo Lopera Sr., 50 anyos, minyo nga taga Sitio Maraat sakop sa nahisgutang lugar, samtang ang mga kriminal pulos wala hiilhi nga nagsakay og motorsiklo.

Matud ni PO3 Thule Tajanlangit, imbistigador sa Toledo City Police Station nga samtang nagkalingaw sa pagpaninda og tempura ang biktima sa gawas nga bahin sa diskohan didto sa Matab-ang , kalit lang niabot ang duha ka suspek nga nagsakay og motorsiklo.

Mihunong kini sa atubangan sa biktima ug sa walay daghang pangutana gidunganan niini og pusil ang biktima.

Nabulit sa mga samad sa bala ang kalawasan sa biktima gikan sa nawong duol sa tuong mata niini, walang abaga, ibabaw nga bahin sa bukobuko ug sentro sa iyang tiyan nga maoy hinungdan sa dihadiha niyang kamatayon.

Padayon pang gipangita sa kapolisan ang mga kriminal.