CEBU - Dili makapaabot ang publiko nga dunay motubag kanila sa police hotline 166 sa dakbayan sa Sugbu kung dunay emerhensiya sama sa tulis ug uban pa.
Kini tungod kay giingong pipila na ka buwan nga wala maayo ang maong linya sukad gibalhin ang radio room sa Mobile Patrol Group diha sa Cebu City Hall.
Matud sa base control operator nga si Edwin Dilero nga dugay na nilang gireklamo ang maong problema apan kini wala pa mahatagi og pagtagad.
Gani ang mga kaubang control operator ni Dilero nibutyag nga kini gisusi na ni Cebu City Police Office (CCPO) Director Senior Superintendent Patrocinio Comendador.
Apan hangtud niining higayona, wala pa mahatagi og solusyon ang nahisgutang suliran hinungdan nga walay gamit ang maong police hotline.
“Mo-ring man ang telepono pero dili madungog ang manawag, so, dili gyud ta ka-establish og contact,” sumala sa usa ka operator.
Nasayran nga ang tag-iya sa Golden Treasures Best of Jewelry Pawnshop diha sa Mango Square nga si Albert Young nadismaya sa maong police hotline.
Kini tungod kay giingong walay nitubag kaniya dihang iyang gi-dial ang 166 atol sa pagtulis sa unom ka tawo sa iyang pawnshop niadtong miaging adlaw.
Subay niini gipahibawo ni Dilero ngadto sa publiko nga imbes 166 ang tawgon, i-dial lang ang 2548304 alang sa police assistance.
“I-dial lang na nga numero kami gihapon ang motubag ana alang sa daling pagtubag sa atong kapolisan sa bisan unsang alarma,” matud ni Dilero.
Nidugang ang control operator nga mahimo usab nga mo-text kanila ang publiko alang sa daling pagtubag sa kapolisan ug alarma.
Kini pinaagi usab sa cell number 09282903677 nga maoy gigamit karon sa Mobile Patrol Group sa programa niining Text-A-Crime.(Elly Bolonos) (BANAT NEWS)