Kawani sa Tudela masweldohan na

CEBU- Sa katapusan makadawat na sa ilang suweldo ang mga kawani sa munisipyo sa Tudela, Camotes human niuyon ang nagkaribal nga mga mayor sa sugyot ni Gobernador Gwendolyn Garcia nga tugutan sa duha ang pag -release sa pundo alang sa mga basic services sa lungsod sa Tudela.

 Si Mayor Roger Baquerfo kauban ang iyang abogado nga si Atty. Noel Archival maoy unang nakig-estorya sa gobernador   sulod sa buhatan niini sa Kapitolyo.

Sumala pa ni Baquerfo nga niuyon siyang mapagawas ang pundo sa Tudela alang sa suhulan sa mga kawani tungod kay panahon karon sa Pasko.

"Apan wala kini magpasabot nga nisugot ko, ang buot pasabot niini mao nga makasuweldo ta ug may magamit sila sa Pasko ug sa pista sa Immaculada karon adlaw nga Lunes. Mao to nga ni come out ang win-win solution na lang aron dili maapektohan ang kwarta sa katawhan," matud pa ni Baquerfo.

Si Baquerfo nipadayag nga andam usab siya mobutang og bond ingon man usab ang karibal niini sa pwesto nga si Mayor Demetrio Granada.

Si Garcia nimando ngadto kang Provincial Treasurer Roy Salubre pagtumbok pilay bond nga ibutang ni Baquerfo ug ni Granada aron mo-release og pundo ang bangko alang sa suhulan sa mga kawani sa Tudela niining bulana. (BANAT NEWS)