65-anyos nakakita'g lalis sa hantakan gitigbas, gipusil

CEBU - Gitigbas og sundang pagkahuman gipusil ug namatay ang usa ka 65 anyos nga tigulang sa iyang silingan nga dugay na niyang gikabangi kabahin sa yuta didto sa Sitio Sun-ok, barangay Puente lungsod sa Carmen niadtong Miyerkules sa alas 9 sa buntag.

Ang biktima mao si Bernardo Amaga Caangay, 65, minyo ug molupyo sa nahisgutang lugar samtang ang suspek mao ra usab ang iyang silingan nga si Ricardo Manaloto, 64, minyo.

Matud ni SPO2 Simplicio Gibo sa Carmen Police Station sa dihang nahinabi sa Banat News subay sa blotter nga gibasehan niini ang biktima miduaw sa luna nga ilang giilogan pagsusi nga nahimutang dili layo sa ilang balay apan kalit lang miabot ang suspek nga nagdala og sundang ug armas.

Sa walay daghang pangutana gitigbas ang biktima ug maayong pagkaigo sa walang abaga ug pagkahuman wala pa matagbaw ang suspek mibunot pa kini sa dala niining armas ug gipusil ang biktima nga naigo usab sa iyang     tiyan.

Ang suspek nga nakamatikod sa ilang mga silingan nga nakabantay sa hitabo ug nagsugod na pagawas sa ilang mga balay pagsusi nagdali kini sa pagsibat samtang ang biktima gitabang ug gidala sa mga silingan ug kabanay sa Danao District Hospital apan gideklarar nga dead on arrival (DOA).

Samtang ang suspek nakit-an sa mga silingan nga nagdaling mipakyaw og habal habal ug nagpahatod sa siyudad sa Danao ug didto misakay kini og sakyanan paingon dinhi sa dakbayan sa Sugbo.

Subay sa inisyal nga imbestigasyon ni Insp. Carlos Reyes Jr., hepe sa Carmen Police Station nga maoy nangunay og responde sa crime scene nahibaw-an niini nga dugay nang nagkabangi ang biktima ug suspek kabahin sa luna niining giilogan ug maoy gituohang hinungdan sa krimen. (BANAT NEWS)