Kawani sa Carcar napantok patay

CEBU - Patay nang nahidangat sa tambalanan ang usa ka kawani sa Carcar City Hall human mapantok ang ulo niini sa semento nga lingkoranan sa iyang pagkahidugmo samtang naggukod sa bola atol sa ilang duwa sa basketball sa nagpadayung Local Government Unit (LGU-Olympics) sa sports complex sa Poblacion-1 siyudad sa Carcar niadtong Miyerkules sa alas 2:10 sa hapon.

Dead on Arrival (DOA) sa South General Hospital sa siyudad sa Naga mao si Roy Ombay Cabonillas, 38, molupyo sa barangay Ocaña ug casual nga kawani sa Carcar City Hall.

Matud ni PO3 Ruben Renes sa Carcar City Police Station dihang nahinabi sa Banat News nagduwa ang team sa biktima dihang nalagpot ang bola paingon sa gawas hinungdan nga gigukod kini ni Cabonillas.

Apan tungod sa sobra kakusog niya pagdagan nasapid ang iyang tiil hinungdan nga na-outbalance ug nalamba kilid sa korte ug aksidenteng naparok ang agtang niini sa kongkretong lingkuranan.

Matud pa sa mga nakasaksi deretsong mikirig ug nakuyapan si Cabonillas.

Naundang ang maong duwa ug daling gidala sa Carcar District Hospital si Cabonillas apan tungod kay nilagom na kini girekomendar sa mga doktor nga ipa-diretso sa tambalanan dinhi sa dakbayan sa Sugbo.

Apan paghiabot nila sa South General Hospital sa siyudad sa Naga gideklarar na kini sa mga doktor nga patay na.

Ang kapolisan nihulagway nga aksidente gyud ang nahitabo tungod kay walay na-report nga may mitukmod kaniya dihang kini nasapid. (BANAT NEWS)