Kalabira sa babaye nasikpaw

CEBU - Kalabira sa usa ka babaye nga gigapos ang duha ka kamot ug giputos og plastik ang ulo ug gihiktan og nylon sa liog nasikop sa sikpaw sa usa ka mananagat sa barangay Tunga, lungsod sa Moalboal

Si PO2 Teodolo Baya Jr. sa Moalboal Police Station nga gikahinabi sa Banat News miingon nga si Kapitan Prosepina Templado maoy mipa-alarma sa kapolisan sa dihang nakit-an sa mananagat nga nailhang si Ramil Gaballo, 20, ang kalabira sa babaye nga gituohang gipatay pinaagi sa pagputos og plastik sa ulo ug paggapos sa wala pa ilabay sa dagat.

Matud pa ni PO2 Baya nga si Gaballo nanguha og uwang sa kilid sa kanal sa maong punong apan sa kalit lang nasangit sa usa ka gahi nga butang ang iyang sikpaw.

Si PO2 Baya nagkanayon nga sa dihang gisusi ni Gaballo kun unsang matang sa gahing butang ang nasangit sa sikpaw kilid sa punong nga adunay gamay’ng lungag, nasurpresa kini tungod kay usa ka kalabira sa tawo ang iyang nakit-an nga nagsul-ob pa og sinena sa babaye nga de kolor.

Ang kalabira nakit-an nga kulang na og bukog sa buko-buko ug gikatahong ang ulo niini giputos sa baga nga puting plastik nga gihiktan og nylon, samtang ang duha ka mga kamot niini gibugkosan og pisi.

“Nagduda mi nga gipatay gyud ning biktima gumikan kay giputos man ang ulo nga gihiktan. Lakip nga gihiktan ang iyang duha ka mga kamot. Nagguba usab ang nawong niini nga sama sa gibunalan,” sumala pa ni PO2 Baya.

Giangkon niini nga dunay mananagat diha sa ilang lugar nga na-missing sa miaging bulan apan gikatahong wala kini gi-report.

Hinuon ang nahanaw nga mananagat usa ka lalaki.

Sumala pa niini nga ang maong kalabira kasamtangang gibutang sa ilang buhatan samtang ila pa kining giandam aron ipadala sa PNP-Crime Laboratory-7.  (BANAT NEWS)