Nanulis sa tindahan og mga alahas nailhan na

CEBU - Nailhan na sa kapolisan sa dakbayan sa Sugbu ang tulo sa pito ka mga tulisan nga maoy nanulis niadtong miaging hapon sa Golden Treasures Best of Jewelry nga nahimutang sa ikatulong andana sa Mango Square Mall sa dalan General Maxilom   barangay Camputhaw ning dakbayan.

Nasayran nga mosobra sa P1 milyon nga mga mahalong alahas ingon man diamond nasakiyo sa pito ka mga tulisan nga yano lang kaayong misulod sa maong mall atol sa ilang pagpanulis.

Si Sr. Supt. Patrocinio Comendador, hepe sa kapolisan sa dakbayan sa Sugbu nagkanayon nga ang tulo nailhan sa ilang mga testigos human mapakita ang mga hulagway niini.

Apan si Comendador nagdumili pa sa pagbutyag kun kinsa ang mga pangalan niini samtang nagpadayon pa ang ilang hot pursuit operations gawas lang sa pagpahibalo nga organisado ang grupo nga gikan sa Mindanao ug adunay mga local boys nga kontak dinhi sa Sugbu.

Matud pa niini nga karong semanaha ilang ipasaka ang kasong pagpanulis batok sa maong mga suspetsadong tulisan, samtang ila unyang ipagawas ang mga hulagway niini.

Giklaro niini nga ila usab karong gilantaw ang anggulo sa nahitabong pagpanulis niadtong Mayo 27 ning tuiga diha sa Oro Sugbu Pawnshop nga nakuhaan og kapin sa P13 milyones   tungod kay dunay posibilidad nga mao ra ang mga tulisan gumikan sa pattern sa pagpanulis ug susama og estilo nga gipamuak ang mga bildo sa estante.

Samtang gitug-an usab niini nga ila karong gisubay sa Land Transportation Office-7 ang tag-iya sa sakyanan nga puti nga Nissan Sentra Sedan GEG-907 diin gikatahong gikan sa Ozamiz city.

Nagtuo si Comendador nga ang mga tulisan migamit kinig duha ngadto sa tulo ka mga sakyanan atol   sa ilang pagsibat sa dihang gi-abandonar ang Nissan Sedan diha sa may Maria Christina extension, barangay Camputhaw.

Apan nagtuo sila nga nia pa   sa dakbayan sa Sugbu ug wala pa makasibat ngadto sa laing lugar diin sagad buhaton sa mga propesyonal nga tulisan nga dili gilayon mosibat.

Samtang ang kabahin sa 166 ang Hot Line sa kapulisan nga gi-reklamo sa tag-iya sa Golden Treasures nga si Albert Young nga matud pa wala gilayon mitubag sulod sa unom ka bagting, matud pa ni Comendador nga mi-coordinate na ang CCPO ngadto sa buhatan sa PLDT ingon man sa buhatan sa Cebu City Hall aron usab mapangitaan kinig sulosyon gumikan dugay na ang maong problemaha. – BANAT NEWS