Illegal recruiters gikasohan na

CEBU - Gipasakaan na og kaso nga illegal recruitment ang tulo ka mga tawo nga nanguha og mga batan-ong babaye aron ipasulod og trabaho didto sa Iloilo City.

Giila ang mga suspetsado nga sila si Jaime Cabreros, 24, Freddy Flores, 26, ug Rudy Sebellano nga taga Zone Agbate sa barangay Paknaan, dakbayan sa Mandaue.

Ang tulo nasikop dihang misumbong sa mga otoridad sa International Justice Mission sa Iloilo City ang usa sa gipasulod nila’g trabaho sa casa didto sa maong dakbayan.

Si Bise Mayor Carlo Fortuna miingon nga misumbong kanila ang kapolisan sa Iloilo kalabot sa maong babaye nga taga Mandaue nga nagpasalbar sa kapolisan sa Iloilo human molayas gikan sa casa nga gitrabahoan niini.

Matud pa niya nga si Iloilo City Mayor Jerry Treñas ang mimando sa iyang   kapolisan sa paghimo’g operasyon aron maluwas ang mga biktima nga taga dakbayan sa Mandaue.

Kini pinaagi sa pag-umol sa kapolisan sa Iloilo sa ilang Oplan Adam Apple nga maoy gitahasan sa pagluwas sa mga biktima nga sa kasamtangan anaa pa karon sa usa ka casa sa maong dapit. – BANAT NEWS