Manaygon giwarningan

CEBU - Gipasidan-an karon ni Cebu City Councilor Gerardo Carillo ang mga manaygonay nga magpaabot sa tukmang panahon aron dili makamulta o mabalhug ba hinoon sa bilanggoan.

Kini tungod kay ang dakbayan dunay ordinansa nga nagdiklarar sa pagpanaygon nga illegal kung kini wala sa tukmang panahon.

Ang City Ordinance 1931 nga gipangamahanan ni Carillo kaniadto naglatid nga mahimo lang manaygon ang mga carolers panahon sa Christmas season.

Kini magsugod sa Disyembre 16 hangtod na sa unang Domingo sa Enero matag tuig ug gikan lang usab sa alas 7:00 sa buntag hangtod sa alas 10:00 sa gabii.

Gawas niini gikinahanglan pa usab sa mga manaygonay nga molukat og mayor’s permit ug mobayad og P50 nga permit fee.

Ang dili pagsunod sa maong mga lagda nga nalatid sa ordinansa mahimong mabilanggo hangtod sa lima ka adlaw o multa nga moabot sa P500.

Napanid-an ni konsehal Carillo nga aduna nay nagsugod sa pagpanaygon hinungdan nga mihimo siya ning maong pasidaan.

Sa susamang kalamboan, usa usab ka ordinansahon ang gipalabang ni konsehal Bebot Abellanosa nga magdili sa pagpanaygon sa kadalanan.

Partikular na niini niadtong kabataan nga manakay sa mga jeep de pasahero ug manaygon ngadto sa mga pasahero.

Nakita ni konsehal Abellanosa ang risgo nga gihatag niini sa kinabuhi sa mga bata hinungdan nga iyang gipalabang ang maong proposal sa mga minor de edad.

Kung maaprobahan ang maong ordinansahon, ang mga ginikanan na sa minor de edad maoy mag-atubang unya og silot nga nalatid niini. – BANAT NEWS