Capitol wa modikta sa City hall

CEBU - Ang kadagkuan sa lalawigan sa Sugbu miklaro nga wala nila diktahe ang mga opisyal sa dakbayan sa Sugbu bahin sa pagbaligya niini sa South Road Properties (SRP).

Si Rory Jun Sepulveda, Capitol consultant on information, and revenue   generation nagkanayon kagahapon nga walay plano ang probinsya sa Sugbu nga modirehir kung unsay buhaton sa dakbayan sa Sugbu nianang SRP

Matud ni Sepulveda nga sa pagka karon ang ilang gihimo mao lamang ang pagpadayag sa ilang mga opinion pagpahibawo sa mga opisyal sa dakbayan sa Sugbu nga dili husto ang ilang gihimo ug igo lang silang mipadayag sa ilang unsolicited advise.

Ang maong pamahayag ni Sepulveda maoy iyang reaksyon sa migawas nga balita kagahapon nga matud pa mihiwasa si Mayor on-leave Tomas Osmeña dihang nasayran niini nga gisaway sa taga Kapitolyo ang kontrata tali sa kagamhanan sa Cebu City ug sa Filinvest Land Incorprated.

 Si Sepulveda nga maoy tigpamaba usab sa Kapitolyo nagkanayon nga usa lang ang director sa dakbayan sa Sugbu ug kana mao si on-leave mayor   Osmeña.

Gitataw ni Sepulveda dili gyud mahimong dunganon ang direct sale ingon man ang   Joint Ventures Agreement sa dakbayan sa Sugbu uban ang Filinvest.

Kini tungod kay gihulagway ni Sepulveda nga walay kahigayonan niini ang uban nga nagtinguhang mopalit og luna O ba kaha direktang mopalit og luna diha sa SRP. - Rey B. Pasaporte (BANAT NEWS)