CEBU - Nasurpresa ang mga opisyal sa Comelec sa dakbayan sa Sugbu tungod sa bagang duot sa mga tawo nga gustong magparehistro.
Kini atol sa unang adlaw sa pagpahigayon sa voters continuing registration nga gisugdan kagahapong adlawa.
Matud ni Cebu City North District Election Officer Attorney Marchel Sarno nga wala sila magdahom nga ingon niadto ka daghan ang magparehistro sa unang adlaw. Gani miingon si Sarno nga ila na lang gipapauli ang ubang magparehistro tungod kay naguba usab ang ilang makina nga maoy mobasa sa fingerprint.
Sa iyang bahin gihulagway usab ni Cebu City South District Election Officer Attorney Edwin Cadungog ang unang adlaw sa pagpangrehistro nga susama sa katapusang adlaw.
Matud ni Sarno nga tungod sa kadaghan sa magparehistro, naguba usab ang ilang usa ka data capturing machine nga maoy nakapasamot sa kalangay sa mga magparehistro.
Gikalipay hinoon sa duha ka election officer sa dakbayan ang pagpunsisok sa mga tawo nga buot magparehistro kagahapong adlawa.
Matud ni Sarno nga kini nagpakita lang nga interesado na nga mobotar ang mga Sugbuanon sa umaabot nga piniliay karong 2010.
Sa iyang bahin miingon si Cadungog nga dili angayang mabalaka kadtong gusto nga magparehistro tungod kay hangtud pa sa Disyembre sunod tuig ang continuing registration.
Sumala ni Cadungog nga mohunong lang sa Disyembre 19 ang pagpangrehistro tungod usab sa nagsingabot na nga Pasko ug Bag-ong Tuig.
Apan midugang ang election officer nga ang continuing registration mobalik ra usab unya sa Enero 5 hangtod na sa Disyembre 15 sunod tuig.
Gikinahanglan lang nga magdala sa ilang Identification Card kadtong gusto nga magparehistro sama sa student ID, Company ID, Postal ID ug uban pa.
Lakip sa gidasig sa Comelec nga magparehistro mao kadtong mga batan-on nga mag-edad og 18 anyos atol sa adlaw sa eleksyon unya sa tuig 2010. – BANAT NEWS