Gikiha og estafa gipusil

CEBU - Gisulong ug gipusil samtang nahinanok sa pagkatulog ang usa ka 52 anyos nga mag-uuma nga nag-atubang og kasong estafa tungod sa iyang pagpamaligya og kanding ug gikobra daan ang bayad apan wala gyud niya i-deliber sa nakapalit.

Ang pagpamusil nahitabo didto sa Sitio Puti, barangay Hagnaya, lungsod sa Carmen niadtong Lunes sa alas 4:50 sa kaadlawon samtang nahinanok sa pagkatulog ang biktima tupad sa iyang asawa.

Ang biktima mao si Santos Hortellano, 52, minyo ug usa ka mag-uuma nga molupyo sa nahisgutang lugar samtang ang suspek wala pa mailhi sa paghimo ning balita.

Gibutyag ni Insp. Carlos Reyes Jr., hepe sa Carmen Police Station sa dihang nahinabi sa Banat News gibutyag sa asawa sa biktima nga wala makuha sa kapolisan ang pangalan nga samtang natulog sila niadtong higayona namatikdan nila nga dunay tulo ka mga tawo nga nagsuga og flashlight nga mipaduol sa ilang balay ug pagkataud taod nakadungog kini og buto sa armas ug dayon nagdaling milakaw pahilayo ang maong mga lalaki.

Paglabay sa pipila ka gutlo namatikdan nalang niya nga nag-agolo na ang iyang bana ug nagkadugo na ang ulo niini hinungdan nga nangayo dayon siya og panabang ug gidala dayun sa Danao District Hospital apan gi-refer usab dayun sa mga doktor sa Vicente Sotto Memorial Medical Center (VSMMC) tungod sa seryosong kahimtang niini human nalubong sa ulo ang bala ug wala pa makuha.

Gidugang ni Insp. Reyes nga sa milabay’ng semana gipadad-an nila og summon ang biktima human mireklamo sa ilang buhatan ang gibaligyaan niini og kanding tungod sa pagkuha daan sa halin apan wala gyuy kanding nga gi-deliber niini. – BANAT NEWS