CEBU - Usa ka estante nga mga mahalong alahas gihurot og hakop sa duha sa unom ka mga tulisan nga mitulis sa usa ka tindahan og mga alahas nga nahimutang sa ikatulong andana sa usa ka mall sa dalan General Maxilom Ave., barangay Camputhaw ning dakbayan.
Ang gitulis sa unom ka mga tawo nga wala magmaskara mga alas 3:50 kagahapon sa hapon mao ang Golden Treasures Best of Jewelry sa ikatulong andana sa Mango Square Mall.
Si Rudolf Ramos, sakop sa SS7 Security Agency ug guwardiya sa maong tindahan og mga alahas, miasoy sa mga Theft and Robbery Section ug Task Force Motorcycle sa Cebu City Police Office nga samtang nagbarog siya sa gawas sa tindahan nga nag-atubang nga nagtan-aw sa tindahan, sa dihang may usa ka tawo nga misulod ug nagpaka-aron-ingnong kustomer.
Didto sulod sa maong tindahan ang anak sa tag-iya nga si Irene Young uban sa usa ka kustomer nga lalaki nga gi-entertain niini. Ang maong kustomer nga si Christopher Asuriz nga empleyado sa La Tondeña ug usa ka kaslonon gikuhaan sa mga tulisan sa iyang necklace nga bulawan ug cellphone.
Pipila ka gutlo, naabot ang laing tulo ka tawo sa iyang luyo ug mideretso og disarma sa iyang service firearm nga .38 kalibre dungan ang pagmando kaniya sa paghapa sa salog.
Samtang naghapa, giyatakan siya sa usa sa mga tulisan aron dili patan-awon kanila.
Ang duha sa mga tulisan nga nagbitbit og wala matinong kalibre sa mubo nga armas misulod sa tindahan ug namuak sa mga estante gamit ang armas ug gamay nga Christmas tree nga gi-adorno sa tindahan.
Ang duha ka tulisan maoy nanulod sa mga alahas ngadto sa usa ka itom nga bag. Nahimo kini sulod lamang sa tres minutos, sumala pa sa guwardiya ni Ramos.
Ang usa ka tulisan nga nagpaka-aron-ingnong kustomer maoy nagsilbe nga lookout, apan didto lamang kini sa sulod sa tindahan. Laing lookout niini didto nagbarog sa pultahan nga nagbitbit og “baby armalite.”
Gawas sa upat ka mga tulisan nga misulod sa tindahan, adunay dako og lawas nga may barog nga 5’8” nga laing tulisan nga misulod sa mall.
Laing tulisan nagpaabot sa “gate-away vehicle” nga usa ka Nissan Saloon nga puti nga nagtangag sa plate number GEG-907 nga naka-parking sa third level (rooftop) sa naasoy’ng mall.
Paggawas sa mga tulisan gikan sa Golden Treasures, mideretso kini og sakay sa maong gate-away vehicle. Apan sa ilang paggawas sa mall, mga trabahante sa usa ka restaurant nga nahimutang duol sa maong tindahan gipangtionan sa mga tulisan.
Ang gipangtionan mao sila si Joel Tacod nga usa ka chef cook, Marpin Jecain nga nakuhaan sa iyang cellphone ug usa ka laing babaye nga nakuhaan sa iyang cellphone ug bag.
Sa pagpadagan na sa kotse sa mga tulisan paingon sa ubos, adunay guwardiya sa mall nga nailang si Leslie Llera nakamatikod sa komosyon sa rooftop, dali niyang gigukod ang kotse apan mi-aksiyon og tion ang usa sa mga tulisan sa bitbit niining baby armalite hinungdan nga mipasalipod na lang siya sa bongbong sa kahadlok nga rakrakan.
Apan samtang mipasalipod siya, gi-radyohan niya ang kaubang guwardiya nga si Rafael Garcia pagpahibalo nga pababagan ang puti nga kotse ug ipakuha ang plate number kay matud niya “nag-wild sa taas.”
Ang kotse wala dayon makagawas tungod kay adunay laing Tamaraw nga nag-ali hinungdan nga nakahigayon siya sa pagtan-aw sa mga sakay sa kotse, apan nakadungog hinuon siya og buto.
Nakita niya nga nabuslot ang windshield sa gate-away car sa mga tulisan, apan ikaduhang pabuto didto na ipunting ni Garcia hinungdan nga midagan na lamang siya. Ang bildo sa tuong bintana sa kotse nabuslot usab, subay sa nakita ni Garcia.
Nakasibat ang kotse apan sa dihang gilili ni Garcia, gipagimaw pa sa usa sa mga tulisan ang baby armalite.
Ang grupo ni Sr. Insp. Michael Anthony Bastes, hepe sa TRS, uban sa TF Motorcycle pinanguluhan ni Supt. Pablo Labra II, naka-recover sa gi-abandonar nga gate-away car sa Maria Cristina Extension, duol sa Redemptorist Church.
Adunay nakakita nga nanaog sa kotse nga nagsul-ob og pula nga T-shirt nga nagdala og itom nga bag, apan kalit lamang kining nahanaw.
Ang Oplan Universe sa CCPO gi-activate gilayon sa kapolisan tungod sa hitabo.
Ang tag-iya sa tindahan nga si Albert Young, pinaagi sa anak niini nga si Irene, wala pa makahatag sa ensaktong balor sa mga alahas nga nasakiyo sa mga tulisan. – BANAT NEWS