Galeos mipasalig serbisyo bisan...

CEBU - Mipasalig si Mayor Edsel Galeos sa lungsod sa Argao nga dili maapektuhan ang basic services sa lungsod karon nga gikunhoran ang ‘classification’ gikan sa pagka-second class ngadto na sa pagka-third class municipality niini.

Si Galeos nagkanayon nga makahatag hinuon kini og epekto sa mga empleyado sa balay-lungsod gumikan kay maglisod na siya pagpatuman og usbaw sa suweldo.

Nasayran nga ang Bureau of Local Government Finance (BLGF) sa Department of Budget and Management (DBM) mi-upgrade unta sa status sa dili mominos 14 ka mga lungsod sa probinsya sa Sugbo ngadto sa taas nga klasipikasyon.

Apan ang Argao nga nalakip sa 14 nga gikan sa pagka-second class municipality misaka na hinuon ngadto sa pagka-third class.

Matud ni Galeos nga dili mabasol ang iyang pamunoan sa lungsod nganong nahimo silang third class gumikan kay ang gibasehan sa DBM mao man ang kita sa lungsod gikan sa 2001 ngadto na sa 2007 apan siya milingkod pagka-mayor niadto lang 2007.

Ang bag-ong first class municipality naglakip sa Bantayan, Consolacion, Daanbantayan, Dalaguete ug mikuyog usab ang Balamban ug Minglanilla.

Samtang second class municipality mao ang Barili, Pinamungajan, Medellin ug naapil usab niini ang San Fernando ug Tuburan.

Ang Badian, Compostela, San Francisco ug Tabogon nahimutang sa third class samtang uban niini ang mga lungsod sa Asturias, Carmen, Dumanjug ug Sibonga.

Samtang gi-upgrade ngadto sa fourth class municipalities ang Sta. Fe, Santander, Alegria, Aloguinsan, Catmon, Madridejos, Moalboal, Oslob, Poro, Sogod ug Tabuelan.

Ang Alcantara, Alcoy, Boljoon, Ginatilan, Malabuyoc, Pilar, Samboan ug Tudela nagpabiling fifth class municipality.

Matud ni Galeos nga posibling mihinay ang tax collection sa Argao sa milabay’ng pipila ka tuig tungod usab sa nasinating krisis sa ekonomiya. (Rey B. Pasaporte) (BANAT NEWS)