Mi-'rape' sa pag-umangkon gipatay

Gisaka sulod sa balay ug gipusil patay ang usa ka 19-anyos nga lalaki nga suspek sa pagpanglugos sa 13 anyos nga iyang pag-umangkong babaye ug mimabdos didto sa bukirang bahin sa Sitio Magkabayo, barangay Capyo-an, lungsod sa Argao niadtong Domingo sa ala 1:40 sa kaadlawon.

Ang biktima nga nakaangkon og samad pinusilan sa ibabaw nga bahin sa dughan mao si Eddie Mangaron Pernito, 19, ulitawo ug first-year high school didto sa Baybay Southern Leyte apan miundang na sa pag-eskuwela ug didto na magpuyo sa maguwang niining babaye nga naminyo sa lungsod sa Argao.

Matud ni PO1 Eddie Semilla sa Argao Police Station sa dihang nahinabi sa Banat News subay sa inisyal nga imbestigasyon gisulod sa balay si Pernito sa usa ka wala mailhing tawo nga nagsul-ob og rubber boots.

Usa ka Ronnie Montebon, nga nagpuyo 50 metros gikan sa gipuy-an ni Pernito nagkanayon nga nakadungog siya sa tingog sa biktima nga mitawag pa og “mama” ug misunod dayon ang usa ka buto sa armas.

Pag-abot sa mga miresponding mga polis, patay na’ng nagbuy-od si Pernito nga dunay samad pinusilan sa dughan.

Matud ni PO1 Semilla nga nag-inusara na nga nagpuyo si Pernito sa balay sa iyang maguwang nga babaye nga naminyo sa maong lugar human ang magtiayon nanglarga dinhi sa dakbayan sa Sugbu human na-buntis ang pag-umangkon niining 13-anyos nga gituohang gilugos ni Pernito. Ang 13-anyos anak sa iyang maguwang babaye nga naminyo og taga Argao.

Ang kapolisan sa Argao miasoy sa Banat News nga gikan pa sa grade-6 gisugdan og lugos sa namatay ang 13-anyos ug hangtod na sa pagka-first year niini apan nabulgar kini sa dihang mimabdos kini.

Gani gibutyag ni PO1 Semilla nga niadtong Sabado gi-serve sa ilang mga kaubanan ang summon gikan sa sala ni RTC Judge Maximo Perez batok ni Pernito human mipasaka og kaso ang mga ginikanan sa gilugos nga 13-anyos.

Hinuon pabilin pa nga gi-imbestigar sa kapolisan ang maong panghitabo aron matumbok ang suspek sanglit ania naman dinhi sa dakbayan manimuyo ang iyang igsuong babaye uban sa bana ug anak niini nga giingon sa kapolisan nga maoy iyang gibiktima.  (BANAT NEWS)