Langyaw nabiktima sa kawat

CEBU - Nahanaw ang mga mahalong butang ingon man kwarta nga P10 mil sa usa ka German National kinsa igo lang nitambung og birthday party sa iyang higala didto sa Dive Point sa Sola homes, barangay Guiwang lungsod sa Alcoy niadtong Sabado sa buntag.

Ang biktima mao si Frank Teschen, hingkod ang panuigon, German National, nagpuyo sa 135 Columbus Street, barangay Cambanua lungsod sa Argao.

Matud ni SPO3 Primitivo Carunggay, hepe sa Alcoy Police Station dihang nahinabi sa Banat News nga ang biktima nga langyaw mitambong kini og birthday party sa iyang higala usab nga langyaw sa maong lugar.

Sa paglingaw-lingaw sa biktima wala kini makabantay nga gisekrito usab og lungkab sa wala pa mailhi nga kawatan ang pultahan sa iyang sakyanan nga giparada sa gawas ug sa pagbalik pa niya ngadto sa iyang sakyanan abli na ang pultahan niini.

Nakuha sa kawatan ang usa ka bosch electrical drill, duha ka bosch electrical jigsaw, duha ka sun glasses nga Lacoste ug kwarta nga P10 mil. – BANAT NEWS