Duha patay sa aksidente sa karsada

CEBU - Duha ka tawo ang patay human sa nahitabong aksidente sa kadalanan sa duha ka lugar sa habagatang bahin sa Sugbu kagahapon sa kadlawon ug niadtong Sabado sa gabii.

Unang insindente nahitabo diha sa national highway sa barangay Pakigni, lungsod sa Minglanilla niadtong Sabado sa gabii kinsa ang biktima giila sa mga polis nga si Benjie Abastillas Barliso, 19-anyos taga sitio Hawanay, Barangay Tapul, dakbayan sa Talisay.

Si PO2 Christopher Castro, duty desk officer sa Minglanilla Police Station sa pakighinabi niini sa Banat News kagahapon sa hapon mibutyag nga si Barliso ang daling gidala sa Minglanilla District Hospital apan tungod sa kahimtang niini ang gibalhin ngadto sa Vicente Sotto Memorial Medical Center apan wala na makaabot nga buhi sa maong tambalanan.

Base sa imbestigasyon sa mga polis nga si Barliso nagmaneho sa iyang motorsiklo nga nagtangag sa plakang YI5-977 diin duna kini angkas nga si Arnold Abalo, residente sa maong lungsod nga nagbiyahe diha sa lugar nga nahitaboan.

Ang motorsiklo ni Barliso nga mi-overtake og traysikol ug ang mini bus nga nagtangag sa plakang GWR-951 nga dunay rotang Carcar-Cebu nga gimaneho ni Nelson Yamomo, 44, taga barangay Awayan, dakbayan sa Carcar ang mi-overtake og truck ang nagkasungag.

Maayong pagkalupad sa motorsiklo ni Barliso hinungdan sa iyang pagkalabay diha sa karsada lakip na si Abalo.

Si Barliso ang nakaangkon og grabeng kadaot sa lawas samtang si Abalo ang nakaangkon og bali lang sa iyang tuong tiil.

Si Yamomo ang gidetiner karon diha sa Minglanilla detention cell.

Sa laing bahin, patay ang 15-anyos nga lalaki human kini malatayi sa ligid sa 10 wheelers truck kagahapon sa kaadlawon diha sa barangay Lutac, dakbayan sa Naga.

 Base sa imbestigasyon sa kapolisan nga si Yumar Juares kinsa truck boy ang gisugo og pagsusi sa radiator ug oil engine sa iyang bayaw nga si Wenceslao Bolado nga drayber sa maong truck.

Si Bolado nagtuo nga nakasakay na sa pagbalik si Juares sa truck hinungdan nga iyang gipadagan ang maong sakyanan apan pagsusi sa suspetsado wala diay makasakay pa ang biktima.

Gisusi ni Bolado ang ilawom sa truck ug nakita na lang niini ang iyang bayaw nga nalatayan diay sa ligid. – BANAT NEWS