Codilla balik na sa fire department

CEBU - Mibalik na sa katungdanan isip Cebu City Fire Marshal si Fire Supt. Ismael Codilla human masuspenso og tulo ka buwan.

Matud ni Codilla nga kun dunay alarma sa sunog nga mutumaw sa siyudad niining mga higayona, siya na ang mangulo sa pagtubag niini.

Nasuspenso ang Fire Marshal human pasakai og kasong administratiba sa kanhi Bureau of Fire Protection (BFP-7) Director nga si Sr. Supt. Eleuterio Iturriaga.

Kini tungod usab sa giingong wala ma-liquidate ni Codilla nga fuel allocation sa Cebu City Fire Department pipila ka tuig na ang nakalabay.

Kusganon hinuong gipanghimakak sa Fire Marshal ang akusasyon ni Iturriaga dungan sa pagpasangil nga gusto lang niini nga siya mahulipan sa katungdanan.

Nasayran hinuon nga si Iturriaga maoy napalagpot dinhi sa rehiyon siete ug gibalhin ngadto sa rehiyon diez didto sa Mindanao.

Nagkanayon si Codilla nga ugma pa siya pormal nga mo-asumir og balik sa katungdanan tungod kay walay trabaho karong adlawa.

Unang buhaton ni Codilla ugmang adlawa mao ang pagpakigtagbo sa iyang mga sakop aron sa paghatag og mga pahimangno niini.

“Ako unang i-meet ang akong mga sakop, muhatag ta og gamay nga instruction unya mubalik sa normal ang operations as possible,” sumala ni Codilla.

Ang temporaryong nihulip kang Codilla sulod sa tulo ka buwan nga si Chief Inspector Victor Vibares giingong automatic usab nga nibalik sa iyang posisyon.

Si Vibares mao ang Provincial Fire Marshal sa Sugbu dihang wala pa masuspenso sa katungdanan ang City Fire Marshal.

Matud ni Codilla nga usa sa mga kalihukan nga iyang hatagan og pagtagad niining iyang pag-asumir og balik sa pwesto mao ang pagpahigayon og inspeksyon.

Partikular na niini sa mga dagkong tindahan sa dakbayan sama sa mga malls ug uban pang namaligya ug mga firecrackers.

Kini aron sa pagsiguro nga luwas gikan sa sunog ang pagsaulog sa Pasko ug bag-ong tuig sa mga Sugbuanon.

“Before siguro sa December 16 (Misa de Gallo) maka-conduct na ta og inspection to ensure nga safe ang atong Christmas ug New Year,” nagkanayon si Codilla. – BANAT NEWS