CEBU - Usa ka 7 anyos nga bata ang naangol dihang nadasmagan kini sa ambulansya sa lungsod sa Malabuyoc didto sa barangay Santa Cruz, Ronda kagahapon.
Ang biktima mao si Rolando Bucog Jr. taga barangay Santa Cruz, Ronda samtang ang suspetsadong drayber mao usab si Ricardo Devilleres, 51, taga Poblacion , Malabuyoc.
Gibutyag sa drayber nga wala siya makabantay dihang kalit lang milabang ang bata sa karsada.
Gidala dayon ngadto sa Badian District Hospital ang biktima aron katambalan samtang ang suspetsado mitahan usab dayon ngadto sa kapolisan uban sa pasalig nga siya’y moabaga sa galastuhan sa hospital. Rica Calinawan (BANAT NEWS)
Giunay’g dunggab sa kainom
CEBU - Usa ka 21 anyos nga lalake ang giunay pagdunggab sa iyang kainom didto sa sitio Rattan, barangay Tangke, Talisay City sa miaging adlaw.
Ang biktima nailhan nga si Jomar Rafana, 21, samtang ang suspek iya lang giila nga si Ikong.
Matud pa sa biktima nga igo lang niyang gitambagan ang suspek gumikan sa plano niining manunggab sa ilang higala,apan sa kalit lang gihansakan siya sa kutsilyo niini ug gitaopan ang iyang tiyan.
Gidala dayon kini ngadto sa Talisay District Hospital samtang ang suspek misirit usab dayon ug gipangita sa kapolisan sa maong dakbayan. - Loraine Ebisa(BANAT NEWS)
Drug pusher tiklo
CEBU - Gibalhog dayon sa prisohan ang usa ka suspetsadong drug pusher nga nasikop sa kapolisan atol sa usa ka buy bust operation didto sa sitio Tunga, barangay Tabunok, Talisay City kagahapon.
Ang suspek nailhan nga si Roger Obero taga Tunga kinsa nasakmitan og usa ka pakiteng shabu ug kwarta nga P100.
Nasikop ang suspek dihang usa ka polis ang nagpakaaron ingnong drug buyer ug dihang mitunol sa shabu ang suspetsado posas dayon ang gipaungot sa iyang kamot. Loraine Ebisa (BANAT NEWS)