CEBU - Gikalipay sa kapin 200 ka mga tinun-an sa Technical Skills Development Authority (TESDA) gikan sa ika-unom nga distrito human madawat nila ang “Scholarship Certificate” gikan kang Presidente Gloria Macapagal Arroyo (PGMA) ug ni Kongresista Nerissa Soon Ruiz sa sixto distrito didto sa Basak Elementary School Gym sa Mandaue City kagahapon sa buntag.
Si Regional Director Rosanna Urdaneta sa TESDA-7 nagkanayon nga gituyo pagmugna sa Pamuno nasud ang programa sa pagpatungha sa mga kabus ug wala na magtungha nga kabataan aron matuman ang iyang pangandoy nga sa tuig 2010 makab-ot ang 10 milyones nga trabaho alang sa mga walay trabaho.
Kini pinaagi sa pagpatuman sa PGMA Training for Work Scholarship Program nga maoy gipanghatag niadtong mga napili ug kwalipikado sa maong programa gikan sa ika-unom nga distrito.
Si Kongresista Ruiz migahin og P3 milyones gikan sa iyang Priority Development Assistance Fund (PDAF) og P500 mil niini iyang gitampo ngadto sa libreng pagtungha sa mga kabus nga kabataan aron makakuha og kurso diha sa Tesda.
Ang maong gahin ni Kongresista Ruiz, gitugbangan usab sa Tesda og P200 mil aron pagsiguro nga daghang mga kabus nga mga kabataan ang makakuha og kurso nga walay bayad.
Si Urdaneta nagkanayon nga diha sa Tesda masanagon ang kinabuhi ug kaugmaon sa mga gradwado kay sayon nalang kanila ang pagpangita og trabaho sa gawas. - BANAT NEWS