Ordinansa sa JVSC napublikar

CEBU - Giinsister ni Cebu City Administrator Francisco Fernandez nga napublikar ang ordinansa sa dakbayan nga nagmugna sa Joint Venture Selection Committee (JVSC).

Kini human usab kwestyona ni Capitol consultant Rory Jon Sepulveda ang pagmugna sa (JVSC) nga maoy nagtoon sa proposal sa Filinvest Land Incorporated.

Gipadayag ni Sepulveda nga kung wala mapublikar ang ordinansa nga nagmugna sa nahisgutang komitiba, kini walay tiil nga mobarog.

Apan matud ni Fernandez nga posibleng wala lang makabantay ang Capitol consultant dihang gipublikar ang ordinansa sa usa ka lokal nga pamantalaan.

“Basin sila wala lang kakita kay nigawas man gud to og Sunday pero wa man mag-ingon nga dili pwede og Sunday, among gi-publish niadtong October 5, 2008,” sumala ni Fernandez.

Ang city administrator nga mao usab ang chairman sa JVSC nitataw nga wala silay gitaguan sa pagpakigsabot-sabot tali sa Filinvest.

Dugang niini interesado usab ang Filinvest paggamit og laing 40 ka ektarya diha sa SRP pinaagi usab sa pagpakig-joint venture sa kagamhanan sa dakbayan.

Nasayran nga niadtong miaging adlaw, nakakab-ot na og kasabutan ang JVSC ug ang Filinvest subay sa giduso niining proposal ngadto sa city government.

Ang nasabutan sa JVSC ug Filinvest gitakdang tukion atol sa umaabot nga sesyon sa konseho sa siyudad karong Miyerkules.

Lakip na usab niini ang pagpublikar sa bidding documents nga maoy basehan niadtong nagtinguha pagpuhal sa tanyag sa Filinvest.

Usa sa nipadayag na og interes sa SRP ug nagtinguha pagpalabaw sa giduso nga proposal sa Filinvest mao ang kagamhanang probinsyal.

Giklaro ni Fernandez nga ilang siguruhon nga makabasa ang mga opisyal sa Kapitolyo sa ilang ipamantala, aron kini dili na mokwestyon sa umaabot nga transaksyon. - BANAT NEWS