CEBU - Negosyanteng tag-iya sa nalabay’ng dolyares sa basurahan pabiling naghangyo sa nakabahin sa iyang salapi sa pag-uli niini kini human 20,500 dolyares ray nabalik sa iyang $60,000 nga nahanaw.
Matud pa ni Emiliano Tanpin,Jr. tag-iya sa usa ka money changing business diha sa Calamba, dako kaayong alkanse sa ilang negosyo ang pagkawagtang niini nga diin namorsiyento lang sila sa matag dolyar sa ilang kliyente.
Niadtong Biyernes, si Julie Compuesto, igsuon sa basurerong maoy nakapunit sa $60,000 dolyares diha sa Inayawan dumpsite niadtong Miyerkules sa kaadlawon ug miangkong nabahinan miuli sa 17,000 dolyares ngadto sa buhatan sa National Bureau of Investigation.
Kini human niya mahibaw-ing nangita na ang tag-iya niini ug nagpatabang na sa NBI hinungdan nga nagpatabang siya sa iyang uyoan nga mabalik ang maong salapi ngadto sa tag-iya.
Mibutyag si Compuesto nga hasta ang iyang iyaang si Victoria Candido giingong nakabahin usab og $6,000 dolyares base sa gitug-an sa ginang ngadto kaniya apan si Candido niadto gihapong adlaw’ng Biyernes miuli lamang og $3,500 didto sa buhatan ni Inayawan barangay captain Rustico Ignacio.
Si Tanpin mibutyag sa interbyu sa DyLA kagahapon nga di siya magpanuko og hatag og ganti ngadto sa mouli sa iyang salapi, midugang usab kini nga di na bale kaniya kung di mabalik ang tanan apan base sa tonada niini sa interbyu kagahapon daw wala kini matagbaw sa kantidad nga nabalik.
Miangkon siyang wala na siyay mahimo kundili ang pagdawat sa kung pilay mabalik kanila tungod kay nagastos naman sa mga nakahipos niini.
Giawhag ni Tanpin si Napoleon Ursabia, ang 16-anyos nga half-brother ni Compuesto sa pagpakita ug iuli ang salaping iyang gikuptan ug di angayang mahadlok.
Si Tanpin nagkanayon nga wala sa iyang huna-huna karon ang pagpasaka og kaso batok sa nakapunit sa iyang salapi basta mabalik lang kini kaniya. - BANAT NEWS