Sundawo gipapuyo sa apartment

CEBU - Pormal nga gipapuy-an sa 30 ka mga enlisted men sa militar ang bag-ong gitukod nga tulo ka units nga 10-door apartment sulod sa Mactan Benito Ebuen Air Base kon MBEAB kagahapon sa buntag.

Ang pormal nga pagtugyan sa mga yawe ngadto sa 30 ka enlisted men gikan sa Philippine Army, Philippine Navy ug Philippine Air Force uban sa ilang mga pamilya gitambungan ni AFP Vice Chief of Staff Lt. Gen. Cardozo Luna; CENTCOM Commander Lt. Gen. Pedro Ike Inserto ug Marit Remonde ang kapikas ni Presidential Management Staff Sec. Cerge Remonde isip representante niini.

Matud pa ni Inserto ang katukuran sa pito ka mga apartment units gihimo aron mapulihan ang apartments sa mga sundalo nga gi-demolished diha sa barangay Lahug dakbayan sa Sugbu niadtong tuig 2006.

 Kini dihang gipaboran sa Korte Suprema sa desisyon niini ang tag-iya sa luna nga gusto nang mobakwi sa maong luna.

Tungod niini si kanhi CENTCOM Commander Lt. Gen. Cardozo Luna mihangyo ni Presidente Gloria Macapagal Arroyo nga kahatagan og gahin ang pagtukod og bag-ong apartment alang sa mga enlisted men sa military.

 Si Arroyo niadtong Hunyo 29, 2007 miaprubar sa 50 milyones ka pesos nga gahin sa maong proyekto gikan sa iyang Presidential Social Fund ug ang 3rd Engineering Brigade sa militar maoy nagtukod sa maong mga edipisyo alang sa mga sundalong aktibo sa ilang mga katungdanan.

 Ang maong proyekto mahimong makapapuyo og 70 ka pamilya sa mga enlisted personnel kung mahingpit kini og katapos.

 Ning tungura gipaniguro ni Inserto nga dili na gyud maabog ang mga sundalo sa ilang gipuy-an gumikan kay ang MBEAB gideklarar na kini nga military reserve lots. - BANAT NEWS