CEBU - Positibo nga tigamitan og ginadiling drugas nga shabu ang duha ka garbage collector sa barangay Luz ning dakbayan sa Sugbu human mogawas ang resulta sa kinalit nga drug test sa mga sakop sa Cebu City Office for Substance Abuse Prevention (COSAP) kagahapong adlawa.
Ang 46 ka mga kawani sa nahisgutang barangay nga naglakip sa mga garbage collector ug mga tanod ang gipaubos sa random drug test.
Ang chairman sa COSAP nga si Felix Jose Lazarte niingon hinoon nga ipaubos pa sa confirmatory drug test ang resulta sa screening test.
“Ato pa nang ipaubos sa confirmatory test, unya after a week ana makadawat na ta og confirmatory report,” sumala ni Lazarte.
Sa iyang bahin gipadayag ni Luz barangay captain Nida Cabrera nga iya unang suspensuhon sulod sa 15 ka adlaw ang duha ka garbage collectors hangtud sa Disyembre 15.
Nagtoo ang kapitan nga dili na mausab ang resulta sa drug screening test hinungdan nga karon pa lang nagplano na si Cabrera pagtangtang sa duha ka garbage collector.
“Imposible na man siguro nga mabali ang resulta sa confirmatory test, so, ato gyud na silang taktakon sa serbisyo inig kapupos sa ilang suspension,” sumala ni Cabrera.
Matud sa kapitan nga ilang namatikdan nga dunay tiggamitan og ginadiling drugas sa iyang mga sakop hinungdan nga siya nihangyo sa COSAP alang sa random drug test.
Ang barangay Luz mao na ang ika-onse ka barangay sa dakbayan nga gipaubos sa COSAP sa kinalit nga drug test sukad niadtong buwan sa Enero.
Sa onse ka barangay nga napaubos sa random drug test, ang mga tanod ug garbage collector lang sa Mabolo ug Sambag 2 ang walay napositibo sa paggamit og ginadiling drugas.
Gipadayag ni Lazarte nga dugang mga barangay sa siyudad ang ila usab nga ipaubos sa kinalit nga drug test sa mosunod nga mga adlaw.
Kini human usab nihangyo ang mga barangay kapitan nga ipaubos sa random drug test ang ilang mga ginsakupan. - BANAT NEWS