Militanteng PAMANA giabog sa taga Argao

CEBU - Giabog na sa mga opisyal sa barangay ingon man mananagat ang mga militanteng pundok nga nagbase karon sa barangay Langtad sa Argao tungod sa pasangil nga maoy naghatag og gubot diha sa ilang dapit.

Kini human usab motumaw nga tumotumo ra ang mga reklamong pagpang-harass nga gipasangil batok sa mga sakop sa 78 IB nga nakabase sa maong barangay nga giingong gipasiatab sa mga militante.

Si kagawad Alex Villamora nipadayag niini atol sa iyang pag-atubang sa mga sakop sa media kagahapong adlawa diha sa Central Command human sa pasangil sa Panaghugpong sa Gagmay’ng Mangingisda (PAMANA) Sugbu aron mapalagpot diha sa ilang barangay ang mga sundalo.

Matud pa niini nga si Victor Lapuz ang presidente sa Pamana-Sugbu maoy nagsige’g sulsol sa ilang kapitan nga dili gyud pabutangan og sundalo ang ilang lugar.

Ang konseho sa barangay mihimo og resolusyon nga nagsuporta sa presensya sa militar sa ilang lugar kung maadlaw apan dili mahimong anha matulog panahon sa kagabhion.

Apan ang resolusyon wala sunda sa Central Command matud pa ni Major Christopher Tampus ang tigpamaba sa Central Command.

Matud pa ni Tampus nga specific ang kamandoan ni Centcom chief Lt. Gen. Pedro Ike Inserto nga magpabilin ang grupo ug mopadayon sa ilang mga kalihukan sa pagpasabot sa katawhan.

Si Villamora nagkanayon nga gibali ni kapitan Ariel Genera ang isyu inay modapig sila sa militar migawas na hinoon nga mialkontra sila sa maayong binuhatan sa militar.

Gitinguha nila karon nga papahawaon ang mga militanteng pundok nga maoy naghatag og kagubot nga pulos di taga diha sa ilang dapit.

Ang mananagat nga si Felomeno Zeta nidason usab nga walay harassment nga nahitabo ug nanghinaot nga mamahawa na diha ang mga militante.

Gihangop usab ni Tampus ang lakang sa Commission on Human Rights (CHR-7) sa pagpahigayon og imbestigasyon labot na sa reklamong sila nang-harass.

Gihagit usab nila si kapitan Genera sa pagsang-at og reklamo ngadto na sa korte kini kun duna may igong ebidensya tungod kay ang presensya sa military normal lang tungod sa gibantayang oil exploration.

Si 2nd Lieutenant Ian Ampaso, team leader sa 78th IB sa nahisgutang lugar nipadayag sa mga tigbalita nga way harassment nga nahitabo ug pulos lang kini tumo-tumo. - BANAT NEWS