Plete sa Traysikol sa Talisay gi-rollback

CEBU - Giaprubahan na sa konseho sa dakbayan sa Talisay ug sa Traffic Commission ang giamendar nga ordinansa sa pagpakunhod sa pletihan sa mga traysikol sa dakbayan.

Si Edward Alesna kinsa tsirman sa Committee on Laws nagkanayon nga sugod Nobiyembre 26, P6.50 na ang pletihan sulod sa tulo ka kilometro isip minimum nga pletihan sa mga traysikol sa dakbayan sa Talisay.

Kini subay sa memorandum sa Land Transportation Franchising and Regulatory Board (LTFRB) tungod sa pag-roll back sa presyo sa gasolina.

Kahinumduman nga ang mga drayber sa traysikol ang supak niini tungod sa rason nga ang mga piyesa sa sakyanan ang wala mokunhod ang mga presyo niini.

Apan si Alesna nagkanayon kagahapon nga dili kada adlaw mopalit og piyesa ang mga drayber alang sa ilang sakyanan kompara sa gasolina nga magsige sila og patobil.

Gibutyag ni Alesna nga tungod sa maong pagpakunhod nila sa pletihan sa traysikol nakadawat siya og mga mensahe sa text nga naghulga nga dili na siya makadaog sa sunod nga eleksiyon kung modagan pa kini isip opisyal sa siyudad.

Ang konsehal nagkanayon nga mas gitan-aw nilang mga opisyal ang kaayohan sa kadaghanan ug di sa pipila lang.

Matud usab niini nga posibleng karong buwan sa Disyembre ang LTFRB ang magpatuman na usab og laing P.50 nga kunhod sa pletihan.

Ang mga sumasakay modugang og piso sa minimum nga pletihan kung molapas na kini sa tulo ka kilometro apan wala itugot nga dunay double charging o ang drayber mangayo og doble nga pletihan ngadto sa pasahero. - Brenda Batuto (BANAT NEWS)