12 ka tawo nalanag sa uhong

CEBU - Tungod sa pagkaon og ‘uhong’ napulo ug duha ka mga tawo ang nalanag apil na ang usa ka 9-anyos nga bata nga pulos mireklamong nagsakit ang tiyan ug nagsuka-suka pipila ka gutlo human makakaon niini.

Naapil og kalanag sa nakaong ‘uhong’ ang mga construction workers nga diha duol sa kabalayan sa mga unang nakakaon human sila mangayo sa maong sud-an.

Ang mga biktima nga pulos nalandig sa tambalanan mitug-an nga ilang gisud-an sa panihapon ang maong ‘uhong’ diha sa sitio Ilacot barangay Cotcot lungsod sa Liloan niadtong Miyerkules sa gabii.

Napulo sa maong mga pasyente apil na ang 9-anyos nga bata nakagawas na hinoon sa tambalanan kagahapon sa kaadlawon human madapati og tambal gawas lang sa duha nga maoy naggrabihan ug nagpabilin pa sulod sa tambalanan.

Gibutyag ni PO3 Jaime Maroliña sa Liloan Police dihang nahinabi sa Banat News nga kagahapong adlawa lang sila nakahibawo niini ingon man ang municipal health officer nga si Dr. Francisco dela Cuesta.

Si Dr. Dela Cuesta nibutyag dihang nahinabi sa Banat News nga gipadalhan niya ang maong barangay sa iyang midwife nga si Diosdada Noval aron pagsusi sa hitabo.

Nagpakisusi ang municipal health kung unsang matang sa ‘uhong’ ang nakaon sa mga biktima.

Ang midwife nga si Noval sa gihinabi usab sa Banat News miila sa mga nangalanag mao sila si Rosita Gomez; Nelia Tecson; Mario Capul; Mary-ann Irog-irog; Ulysses Tundag; Ryan Monseler ug ang lima ka construction workers nga sila si Elimar Gonong; Matias Sangrano; Gerardo Lauro; Romeo Ogayon Sr; ug anak niining si Romeo Jr; pulos hingkod ang panuigon ug ang 9 anyos nga si Al Christian Fladtiosa.

Bugtong sila si Gonong ug Sangrano maoy nagpabilin sulod sa Vicente Sotto Memorial Medical Center (VSMMC) nga maoy nagrabihan ug gituuhang maoy daghan og nakaon.

Gisagol niini sa utan aron isud-an sa panihapon. Gikatahong hinatag ra usab ang maong uhong sa higalang babaye ni Tecson nga nihapit diha sa ilang balay.

Tungod sa kadaghan sa sud-ang naluto ni Tecson hasta iyang mga silingan gipanghatagan niini ingon man sa mga kailang naa sa sikbit nga construction site.

Apan dangtan pila ka minutos human sila manihapon nagdungan-dungan ang mga biktima og mulo sa kasakit sa ilang mga tiyan ug nagsuka-suka hinungdan nga nag-iyahay sila og pa-check up sa Eversely Child Hospital sa siyudad sa Mandaue ug diha na masutang posibleng nahilo sila sa gikaong sud-an hinungdan nga gibalhin sila ngadto sa VSMMC.

Kagahapon sa buntag na nila napahibalo ang municipal health officer ug kapolisan sa maong lungsod kabahin sa hitabo ug karon gisubay na ang tinuuray nga hinungdan sa ilang pagkalanag. - BANAT NEWS