Kawani ni Durano gipusil

CEBU - Naangol ang usa ka kawani sa pribadong kompaniya human kini pusila sa sulod sa iyang sakyanan didto sa barangay Pitogo lungsod sa Consolacion kagahapon sa alas 8:30 sa buntag.

Ang biktima mao si Jonathan Mahusay dela Calzada, 39 , minyo, nga taga barangay Dancar , Danao City ug technical staff sa MLD Dream Builders Inc. nga gipanag-iya sa usa ka Carmen L. Durano.

Si PO3 Nolberto Cejas sa Consolacion Police Station mibutyag   sa Banat News nga nagsakay sa L-300 Van kolor puti ang biktima gikan sa siyudad sa Danao paingon sa opisina niini sa may dalan Acasia St., barangay Kamputhaw siyudad sa Sugbu.

Apan paghiabot niini didto sa highway sa Pitogo, gituparan kini sa usa ka motorsiklo nga gisakyan sa duha ka tawo nga pulos nagbangot og labakara sa nawong unya ang backrider niini maoy miluthang sa biktima.

Ang biktima wala makapanalipod sa kaugalingon kay diha man siya sulod sa sakyanan nga nagdagan busa nasabak siya sa walang kilid   ubos sa sampot.

Ang miresponde nga mga polis maoy mihatod sa biktima ngadto sa North General Hospital sa Talamban siyudad sa Sugbo.

May tiyoriya ang kapolisan nga pagdumot ang hinungdan sa maong pagpamusil.

Kini basi sa pamahayag sa biktima nga may tawo siyang gikalalis niadtong miaging adlaw apan nagdumili sa pagbutyag sa ngalan niini. – BANAT NEWS