Shimura ug Loot magpabilin hangtod 2010

CEBU - Gipasalig ni Rep. Benhur Salimbangon ngadto sa katawhan sa lungsod sa Daanbantayan nga magpabilin siya sa katungdanan hangtud sa tuig 2010 ingon man sila si Mayor Sun Shimura ug Bise-Mayor Maria Luisa Loot.

Kini bisan susama ang kahimtang nilang tulo ka opisyal nga dunay mga protesta nga anaa pa sa Commission on Elections.

Gipadayag ni Salimbangon ang maong katin-awan nunot sa nagpabiling kahingawa sa katawhan sa lungsod ug sa ikaupat nga distrito sa protesta nga ilang giatubang.

Daghan usab nga mga sayop nga impormasyon nga gipakatap nga molingkod na ang ilang mga kaatbang sa dili madugay ug sa dili pa matapos kining tuiga.

Gipasalig ni Salimbangon nga bisan pa sa wala pa nahuman ang protesta, magpadayun sila sa ilang gimbuhaton ug pagserbisyo.

Si Salimbangon giprotestahan sa iya kaatbang nga si kanhi Bogo Mayor Celestino “Tining” Martinez III sa House of Representatives Electoral Tribunal (HRET).

Samtang sila si Shimura ug inahan nga si Loot ang giprotestahan usab sa ilang kaatbang nga sila si Augusto “Itok” Corro ug kanhi bise-mayor Jose de Leon Jr.

Gihukman ni Judge Antonio Marigomen sa Regional Trial Court sa dakbayan sa Bogo nga sila si Corro ug de Leon ang mananaug sa miaging eleksiyon sa miaging tuig.

Apan ang kaso gipasaka hinoon sa kampo ni Shimura ug Loot ngadto sa labaw'ng buhatan sa Comelec.

Masaligon si Salimbangon, Shimura ug Loot nga mopabor kanila ang katapusang hukom sanglit nasuta naman nga dunay mga peke nga mga balota nga maoy gipasikaran sa pangangkon sa ilang mga kaatbang nga sila ang mananaug sa eleksiyon. – BANAT NEWS