CEBU - Usa ka tawo nga giingong naguol human mawagtang ang iyang postiso ang naghikog pinaagi sa paghigot og pisi nga nylon sa iyang liog nga maoy hinungdan sa iyang kamatayon sa miaging gabii sa Zone Calbasa, barangay Paknaan, dakbayan sa Mandaue.
Ang namatay mao si Selvio Fernandez Jr. 24, ug nagpuyo sa maong dapit kinsa napalgang nagbitay sulod sa lawak sa ilang panimalay.
Si PO1 Marino Lufranco sa homicide section sa kapolisan sa maong dakbayan nga nahinabi sa Banat News miingon nga gikan pa nga nakig-inom ang biktima uban sa iyang mga higala.
Atol sa iyang pag-uli anha na niya mamatikding nawagtang ang iyang postiso gumikan sa iyang kahubog maong nagpatabang kini sa iyang mga igsuon pagpangita hain na kini mapunta.
Dugang pa ni PO1 Lufranco labihang guola ni Fernandez dihang nahibalik ang iyang mga kabanay nga wala madala og balik ang postiso maong misulod kini sa iyang lawak.
Dangtan pila ka minutos dihang ilang gisubay si Fernandez sa iyang lawak nakugang silang nagbitay na kini nga may pisi sa liog gikan sa kisame ug wala nay kinabuhi. – BANAT NEWS