Pugante misukol sa polis, patay

CEBU - Usa ang namatay sa walo ka mga nakapuga nga piniriso sa detention cell sa kapolisan sa siyudad sa Bogo sa dihang misukol ug nakigpinusilay kini sa mga polis nga migukod kanila paingon sa barangay Tacop lungsod sa San Remegio kagahapon sa alas 10 sa buntag.

Ang piniriso nga napusilan ug namatay paghidangat sa Verallo Memorial District Hospital sa siyudad sa Bogo mao si Mariano Nieves Antiquina, 18, taga lungsod sa Sibonga ug nag-atubang og kasong pagpangawat.

Sa nahabiling pito ka mga piniriso nga nadakpan og balik tulo niini nagpangidarun og 15 anyos nga pulos nag-atubang og kasong robbery og duha niini molupyo sa siyudad sa Bogo usa ang taga Barili, samtang laing duha ang nagpangidaron og 17 anyos, nga pulos molupyo sa Bogo, usa ang 16 anyos nga taga Bogo gihapon og ang 21 anyos mao ang usa ka Edwin Cabico Caninto, ulitawo, nag-atubang og kasong pagpangawat ug lumad nga taga lungsod sa Sibonga.

Gibutyag ni P03 Allan Dosdos imbestigador sa Bogo City Police Station sa dihang nahinabi sa Banat News ang maong mga piniriso naka-eskapo kini nianang alas 11:30 sa Domingo sa gabii human napakyas pag-lock ang jailguard sa selda sa detention cell. Giguba sa mga piniriso ang duha ka puthaw nga railing sa visiting area tupad sa selda ug didto moagi paingon sa gawas.Nabantayan ang pag-eskapo sa mga police on duty 30 minutos gikan sa ilang pagsibat sa detention cell ug dali dayong mipahigayon og hot pursuit operation ang kapolisan pinangulohan ni SPO2 Nestor Cuerda, SP01 Dennis Villamor ug PO1 Gilbert Agudo.

Pagka buntag niana hilabihang sukoa sa hepe nga si Supt. Tito Satera sa dihang nakahibalo sa hitabo ug pagka alas 9 sa buntag gipasakaan dayun niini og kasong kriminal ug administratiba ang jailguard on duty nga polis nga si SPO1 Edwin Caballeda.

Apan nianang pagka alas 10 sa buntag, matud ni P03 Dosdos nakadawat og tawag ang ilang buhatan gikan sa ilang mga kaubanan nga nangayo og reinforcement human ma-apsi nila ang mga nakapuga nga piniriso didto sa barangay Tacop, San Remegio.

Apan miresulta kini sa pinusilay human dunay armas nga kalibre .38 ang piniriso nga si Antiquina ug misukol pa kini ug unang namusil sa mga polis nga naggukod kanila.

Matud ni PO3 Dosdos mibawos si SP01 Villamor ug pusil ug naigo sa ubos nga bahin sa tiyan og batiis una pa mitahan ang kauban niining mga piniriso.

Gidali unta pagdala sa Verallo Hospital sa siyudad sa Bogo ang napusilan nga si Antiquina apan patay na kining nadangat sa tambalanan.

Samtang dugang nasayran sa Banat News gikan ni SP04 Jose Nonette Medrino sa Bogo City Police Station nga padayun pa nilang gisusi ang mga dokumento kun tinuod ba nga mga minor de edad ang pangangkon sa maong sagad kanila human usab kini gihulagway nga kanunay lang magsulod ug gawas sa prisohan tungod sa mga kaso nga pagpangawat ug pagpanaka og balay sa ilang lugar. (BANAT NEWS)