Talisay may bag-ong police chief

CEBU - Usa ka abogado ug administrative officer sa Cebu City Police Office ang molingkod isip bag-ong hepe sa kapolisan sa Talisay City Police Station kansang kamandoan pag-asumir nagsugod na kagahapon.

Ang officer-in charge nga si Sr. Insp. Jovito Canlapan sa Talisay City Police Station sa pakighinabi sa Banat News kagahapon sa buntag mibutyag nga nagpaabot pa kini sa order sa pag-asumir ni Supt. Henry Biñas.

Kahinumduman nga sulod na sa tulo ka buwan gikan sa pagrelibo sa kanhi hepe sa kapolisan sa siyudad si Supt. Romeo Perigo si Canlapan maoy nahimong OIC sa Talisay City Police Station.

Lima ka pangalan sa mga opisyal usa na niini ang pangalan ni Biñas ang gisumiti ngadto kang Mayor Socrates Fernandez apan ang maong mga pangalan ang gibalik sa mayor ngadto sa provincial headquarters aron mao nay papilion sa angayang maoy ipuli kang Perigo.

Si Hon. Socrates Fernandez, mayor sa dakbayan sa Talisay mibutyag sa Banat News nga dili siya maoy mipili sa mohulip kang Perigo ug iya na kining gitugyan ngadto sa kadagkoan sa PNP.

Si Cebu City Police Office director, Sr. Supt. Patrocinio Comendador nagkanayon nga dako og papel si Biñas sa CCPO isip administrative officer ug legal officer apan di nila angayang pugngan ang pagsaka sa karera sa ilang mga sakop.   (BANAT NEWS)