Competition sa ROTC malamposon

CEBU - Malamposon ang gipahigayong speech ug shooting competition sa mga estudyante nga ubos sa Reserve Officer Training Course (ROTC) niadtong Biyernes didto sa Central Command sa Barangay Apas, Lahug, dakbayan sa Sugbu.

Si Colonel Armando Dancel , Signal Corp. (SC), General Staff Course (GSC) mibutyag sa Banat News nga ang maong kalihokan adbokasiya sa ilang labaw’ng buhatan aron modaghan ang mga estudyante nga magpa-enroll sa ROTC.

Gipasabot niini nga ang ROTC usa sa mga tinubdan sa mga opisyal sa armadong kusog ug makapahimo sa mga batan-on nga disiplinadong mga molupyo.

Alang kang Dancel, ang mga batan-on maoy mga umaabot nga lider sa nasud ug dako ang papel sa ROTC alang sa pagtanos kanila aron mahimong tarong ug matinud-anong Pilipino.

Ang tema sa maong kalihokan mao ang “ROTC Empowering The Youth Towards A String Republic.”

Gipanghinaot ni Dancel nga ang ROTC dili na himuong optional kundili kinahanglang ibalik kini sa pagka- curriculum diha sa tulunghaan.

Ang speech competition gipahigayon didto sa De Goma Hall samtang ang pistol and riffle competition didto usab sa firing range sa Central Command.

Ang makadaog sa shooting ug speech competition ipadala ngadto sa national competition nga ipahigayon karong Disyembre 2008.

Sa maong adlaw ang speech contest adto ipahigayon sa Central Luzon State University sa Nueva Ecija samtang ang shooting competition adto usab sa Fort Magsaysay, Palayan City, Nueva Ecija. – BANAT NEWS