CEBU - Gisaway ni Antero “Jun” Cana ang mga opisyal sa dakbayan sa Mandaue gumikan sa kapakyas nila sa pagtuman sa programa ni kanhi Mayor Thadeo Ouano sa pag-atiman sa kahinlo sa matag barangay.
Si Cana kinsa tigpamaba ni kanhi Mayor Ouano nagkanayon nga nawagtang na karon ang mga plastic garbage bins busa wala nay sudlanan sa basura diha sa kabarangayan.
Matud pa niya nga kadtong mga garbage bins mao toy labayanan sa basura diha sa barangay sa panahon ni Mayor Ouano kaniadto, apan sa pagkakaron giwagtang na kini, matud ni Cana.
Midugang siya nga ang maong mga bins nga gigastuhan og dakong kuwarta katawhan tua na sa mga pribadong establisamento.
Gipasabot ni Cana nga ang maong mga basurahan angayang anha ibutang sa mga barangay ug dili kay sa mga pribadong establisamento kay dili kana maoy angayang butangan nianang butang nga iya sa gobiyerno.
Kahinumdoman nga sa panahon ni kanhi Mayor Ouano maoy iyang gitahasan sa pagbantay sa maong mga basurahan sa kagamhanan ang mga barangay opisyal.
Duha ka kolor ang maong mga basurahan ang gray alang sa madunot nga basura sa papel, sagbot, karton ug uban pa , ug blue nga maoy alang sa dili madugta sama sa plastik, botelya, puthaw ug uban pa.
Apan karon wala na ang basurahan apan ang mga basura maoy naa, matud ni Cana. – BANAT NEWS