Firecrackers sa sidewalk walay mga permit - BFP

CEBU - Gihulagway sa Cebu City Fire Department nga dakong illegal ang gihimong pagpamaligya karon og mga firecrackers nga sayo pa kaayong gipang-display na sa kadalanan ug mga tindahan.

Kini tungod kay giingong wala pay negosyante o nagbaligya niini sa siyudad nga nilukat og permit sa BFP sumala pa ni City Fire Marshall, Chief Inspector Victor Vibares.

Nagkanayon si Vibares nga mahimo nilang sakmiton ang gitinda nga mga firecrackers atol sa ipahigayong inspeksyon sunod semana.

“Na-schedule na man nato ang atong mga activities this coming December, kanang pag-inspeksyon maoy usa sa atong himoon,” sumala ni Vibares.

Sa pikas bahin, posible usab nga idili na sa kamerkaduhan sa dakbayan ang pagpamaligya sa mga firecrackers.

Atol sa gipahigayong tigom sa Market Authority nasabutan niini ang pagpangayo sa guidelines sa kapulisan labot sa pagpamaligya og mga pabuto.

Matud ni City Market Administrator Racquel Arce nga kung dili mahimo nga baligyaan og mga firecrackers ang mga merkado publiko kini hingpit nilang ipatuman.

“Although atong na-identify kung unsa ra ang ibaligya sa kamerkaduhan pero to make it sure, magpadala pa mi og query sa PNP bahin sa firecrackers,” matud ni Arce.   

Sa susamang kalambuan, usa usab ka resolusyon ang ipalabang ni Konsehal Edgardo Labella atol sa sunod nga sesyon sa City Council may kalabutan gihapon sa firecrackers.

Partikular na ang pagpamaligya sa mga watusi ug ubang mga pabuto diha sa mga tunghaan nga delikado sa kabataan partikular na sa mga tinun-an.

Buot masiguro sa konsehal nga mapatuman ang ordinansa sa siyudad labot niini karon nga nagkaduol na ang Christmas season.

Tumong sa nahisgutang mga opisyal sa paghigpit sa mga pabuto mao ang pagsiguro nga masaulog ang Pasko ug Bag-ong Tuig nga malipayon, makahuluganon ug balaanon. - BANAT NEWS