CEBU - Gihulagway sa mga militanteng pundok dinhi sa Sugbo nga usa lang ka gimmick ug propaganda sa kapulisan ug militar aron dunay ikaduso nga ilang accomplishment sa pagtapos karung tuiga ang gihimong pagsikop nila sa usa ka gitumbok nga kanhi amazonang rebeldeng sakop sa New Peoples Army niadtong milabay'ng adlaw.
Si Dorothy Paraiso, nga usa na ka manager sa usa ka pribadong kompaniya nga nag-opisina sa P. Del Rosario ning dakbayan gidakop sa kapulisan ug militar niadtong milabay'ng semana pinasikad sa warrant of arrest sa kasong rebelyon nga iyang giatubang sa nangaging mga katuigan.
Apan gisaway kini sa Karapatan ug matud sa tigpamaba niini nga si Vimerie Arcilla nanaginot lang ang kapulisan ug militar aron dunay performance nga ikabutang sa ilang yearend report karung tuiga.
Matud ni Arcilla nga ang pagka-manager ni Paraiso sa kaugalingong kompaniya sa ilang pamilya nagpakita lang kini nga wala magtago-tago sukwahi sa gipasiatab sa kapulisan ug militar.
“Nanaginot intawon ang mga tawo ni Inserto ug Roderos (Lt. Gen. Pedro Ike Inserto sa Centcom ug Chief Supt. Ronald Roderos sa PRO-7) nga naay ikabutang sa ilang progress report karong hapit na mahuman ang tuig, bisan paman ilang isakripisyo ang mga inosenteng sibilyan,” dugang asoy ni Arcilla.Gihimong basehanan ni Arcilla ang warrant of arrest batuk kang Paraiso niadto pang petsa 24 sa Agosto sa tuig 2004 apan karun lang kini gihatud sa kapulisan ug militar.
Nunot niini masaligon ang Karapatan nga ibasura ra gihapon sa korte ang maong kaso susama sa ubang mga kaso nga nasang-at nga gihulagway niya nga malisyoso ug walay igong basehanan. – BANAT NEWS