Leadman nakuryentihan

CEBU - Paso sa tibuok kalawasan ang nahiaguman sa usa ka leadman sa construction company human giingong nakuryentihan sa main line sa poste sa Visayan Electric Company (VECO) kagahapon sa ala 1:40 sa hapon diha sa gitrabahong bangko sa dalan Archbishop Reyes kilid sa Asilo barangay Camputhaw ning dakbayan.

Ang biktima nailhan sa Banat News nga si Jimmy Avila, 24, nga taga Manila ug leadman sa Briocon Construction nga gipanag-iya ni Carlo Melano nga nakabase sa Makati City apan dunay kontrata dinhi.

Si Judy Macawili assistant leadman nga nahinabi sa Banat News nagkanayon nga silang duha ni Avila ang nitrabaho diha sa second floor sa gihimong bangko ug mikuha sa mga scaffoldings aron ibalhin sa pikas nga bahin sa edipisyo.

Apan dihang nakatalikod siya human gipakupot sa hagdanan, ang puthaw nga scaffolding nga gihuptan ni Avila ang aksidenteNg nasangit sa main line sa VECO hinungdan nga nakuryentehan.

“Makatingog paman to siya. Pero nasunog gyud ang iyang tibuok lawas apil na ang iyang sinina nasunog,” sumala pang Macawili.Sumala pa niini nga gumikan sa kakusog sa kuryente natagak si Avila ug adto nahagsa kang Macawili. – BANAT NEWS