CEBU - Namatay ang usa ka 13-anyos nga batang babaye human gibunal-bunalan og kawayan sa ilang silingan niadtong Huwebes sa alas 5:30 sa hapon sa sitio Madanlog barangay Vive lungsod sa Ronda.
Ang namatay giila sa kapulisan nga si Mary Grace Aranas, tinun-an sa Grade 1 sa Madanlog Elementary School, samtang ang suspetsadong silingan giilang si Raul Dabis, 33.
Si PO2 Wilfredo Clarin sa Ronda Police Station nga nahinabi sa Banat News nagkanayon nga ang biktimang si Mary Grace gikatahong nagsag-ob og tubig sa tubod dihang nahitabo ang krimen.
Matud pa nga samtang nagkuha’g tubig sa tubod ang biktima kalit lang nibutho ang suspetsado ug sa walay igong hinungdan gibunalan ang ulo niini og kawayang tinalisan hangtud nga namatay.
Ang akusado gipasakaan og kasong murder kagahapon ingon man kalapasan sa RA7610 kon Child Abuse ug kasamtangan na karong gitanggong sa karsel.
Si PO3 Christoper Bani nga maoy nagkupot sa kaso sa Ronda Police Station nga gikahinabi sa Banat News nga panagbangi sa yuta maoy hinungdan nga pagpatay sa biktima.
Matud pa niini nga ang inahan sa biktima nga si Milagros nitug-an nga niadto pang 2007 gisulong sila sa maong suspetsado gumikan sa panagbangi sa yuta ug nahitabo lang nga niadtong niaging adlaw gipatay na gyud ang ilang anak.
‘Kini lay napahimungtan ang bata hinungdan nga gipatay gibunal-bunal ang ulo unya grabi usab ang kadaot sa nawong,” asoy pang Bani apan wala makatino kung kang kinsang yuta ang ilang gilalisan.
Dugang pa niini nga ang inahan nitug-an nga sa nilabay’ lang buwan makaupat sila gisulong niini ug maka-upat usab sila magkaabot sa barangay.
Sumala pa niini nga usa ka 6-anyos nga batang babaye maoy ilang testigo batok sa akusado kinsa maoy nakahatag nila’g detalye sa krimen. – BANAT NEWS