CEBU - Dili supak ang Cebu City Comelec Office sa sugyot sa pipila ka konsehal sa dakbayan nga butangan og registration booth ang pipila ka malls sa siyudad subay sa nagkaduol na nga pagsugod sa continuing registration nga gitakda karong sunod Lunes (Disyembre 2).
Apan ang napanglantawang problema mao ang kakulang sa data capturing machine sa Comelec-7 alang niini.
Matud ni City Election Officer Atty. Marchel Sarno nga walay balaud nga malapas kung himoon usab ang pagpangrehistro diha sa mga malls.
“Okay ra man sab na kay ang gi-require sa balaud nga it should be done in a public place unya kining mga mall public place man pud na,” sumala ni Sarno.
Gitataw hinoon sa election officer nga siya kinahanglang mananghid pa sa ilang rehiyonal nga buhatan alang sa pagtugot niini.
Una nang gisugyot nila ni Konsehal Gerardo Carillo ug Konsehal Joey Daluz nga butangan og registration booths o satellite registration offices ang pipila ka mall sa siyudad.
Kini aron mahatagan gihapon og higayon nga makaparehistro kadtong mosuroy sa mga malls sa mga adlaw'ng Sabado ug Domingo.
Ang city government giingong andam nga moabaga sa galastuhan sa satellite offices partikular na sa abang sa lugar nga butangan niini.
Tulo ka mga mall sa dakbayan ang gisugyot ni Carillo nga mahimong kabutangan og registration booths o satellite registration offices.
Kini mao ang Ayala Center Cebu, SM City Cebu, ingon man ang Elizabeth Mall diha sa Natalio Bacalso Avenue ning siyudad.
Giklaro hinoon ni Sarno nga mahimong ilang libuton ang mga malls nga gisugyot ni Carillo apan giingong dili mahimo nga kini dunganon.
“Dili na pwede nga dunganon nato every weekend kay duha ra ang atong data capturing machine nga gamiton sa pagpangrehisto,” nagkanayon si Sarno.
Ang continuing registration nga sugdan karong sunod Lunes, gitakdang tapuson unya sa Disyembre 15 sunod tuig. – BANAT NEWS