CEBU - Naputos sa mga bun-og ug samad ang tibuok kalawasan sa usa ka tanod human kini gitabangan og bunal og kahoy una pa gidakdakan og bato sa manag-amahang gikaaway niini diha sa sitio Dakit, Poblacion lungsod sa Pinamungajan niadtong Miyerkules sa alas 8:00 sa buntag.
Ang biktima nga nalandig sa tambalanan dinhi sa dakbayan sa Sugbo giilang si Laudelino Ondalok Moñares, 58, tanod sa maong lugar ug nag-sideline usab sa pagpamasahero og habal habal.
Samtang ang suspek mao ang manag-amahang sila si Cepriano Popera Sr, ug anak niining si Cepriano Jr, nga pulos molupyo sa nahisgutang lugar.
Matud ni PO1 Renante Mahusay sa Pinamungajan Police dihang nahinabi sa Banat News naglingkod sa waiting shed ang biktima niadtong higayuna dihang nakit-an sa mga suspek.
Gikatahong nagbitbit og kutsilyo ug gipangita ang anak sa biktima nga si Leo Moñares hinungdan nga gidagan kini sa biktima ug giunhan og hamag ang duha aron ilugon ang dalang kutsilyo.
Atol sa linayogay nakabantay ang anak sa suspek ug daling nitabang ug gibunalbunalan og kahoy ang biktima sa ulo ug kalawasan hangtud nga natumba.
Wala pa matagbaw ang duha mipunit og dakong bato si Cepriano Sr. ug gidakdakan ang ulo niini ug gibiyaan.
Ang mga molupyo na sa lugar maoy nihatud sa biktima sa Pinamungajan District Hospital ug gibalhin sa Vicente Sotto Memorial Medical Center (VSMMC).
Samtang nasikop sa follow-up operation sa kapulisan ang duha apan gipatambalan usab kini sa tambalanan dinhi sa dakbayan sa Sugbo human usab makaangkon og mga bun-og ug pangos sa ilang kalawasan. – BANAT NEWS