CEBU - Nagusbat ang nawong ug naputos sa mga samad ang kalawasan ug naputol ang kamot sa usa ka mangingisda human kini mabuthi og dinamita nga iyang gigamit sa pagpanagat sa kadagatan sa isla sa Pajee lungsod sa Daanbantayan niadtong Miyerkules sa alas 6:00 sa gabii.
Ang biktima nga namatay diha-diha ug wala na madala pa sa tambalanan mao si Noel Olidon,34, taga sitio Damba barangay Maya sakop sa nahisgutang lungsod.
Matud ni SPO2 Nero Manzanares sa Daanbantayan Police dihang nahinabi sa Banat News sakay sa iyang sakayan ang biktima ug nangita og mga duot sa isda nga iyang tiklungon.
Dihang nasigpatan ang duot sa isda dali siyang midagkot sa dinamita apan una pa niya kini malabay ngadto sa mga isda kalit kining mibuto sa iyang kamot hinungdan sa pagkagusbat sa nagkadaiyang parte sa lawas niini ug napungkol ang iyang bukton.
Ang biktima gitabang sa ubang mga mananagat nga nakakita kaniyang nagbuy-od nalang sa iyang sakayan apan patay na gyud kini.
Ang patay’ng lawas sa biktima kasamtangang gihaya sa pinuy-anan niini sa barangay Maya ug sa paghimo ning balita gitakda pang ipaubos sa autopsy sa municipal health officer sa maong lungsod. – BANAT NEWS